Kasaphana urbane dhe pakti politikë-oligarki, sipas kandidatit të Lëvizjes “BASHKË” për Tiranën, Arlind Qori, janë ato që po e shkatërrojnë kryeqytetin dhe po na vrasin çdo ditë.
Teksa renditi problemet e mëdha që ka Tirana, Qori tha në “Të Paekspozuarit” se reduktimi i hapësirave publike dhe betonizimi nga Erion Veliaj, ia kanë marrë fymën qytetit, ku 3 mijë banorë vdesin çdo vit vetëm nga ndotja e ajrit.
“Kasaphana urbanistike. Në Tiranë është ndërtuar shumë, është ndërtuar keq, është zaptuar hapësira publike, janë zhdukur parqet, terrenet sportive, këndet e lojrave, janë ngushtuar trotuarët, në këtë kuptim Tirana është një qytet pa hapësirë. Kur ndërtohet kaq shumë, kur hapësira publike reduktohet, kur intensifikohet trafiku, të gjitha këto ndotin ajrin. Po lexoja një statistikë që thoshte se në Tiranë vdesin rreth 3 mijë qytetarë çdo vit nga ndotja e ajrit. Pra, ndërtimet pa kriter, trafiku, mungesa e gjelbërimit po na sëmurin.
Tirana ka më pak shkolla seç duhet të kishte. Një nga arsyet është se nuk ke ku gjen më terren. Nëse terrenin publik e jep për kullë, nuk ka më vend. Në Tiranë nuk ka ujë të pijshëm. Rrjeti i ri i kanalizimeve kushton shumë shtrenjtë edhe për shkak të kaosit urbanistik. Në Tiranë është shumë shtrenjtë të banosh, ka vajtur metri katror 1200 euro mesatarisht. Një çift i shtresës së mesme nuk e përballon dot më për ta blerë.
Qiraja rritet nga viti në vit, pavarësisht se ndërtohet shumë. Kjo krijon dyshimin, se një pjesë e kapitalit investues vjen nga nëntoka kriminale dhe një pjesë e fuqisë blerëse vjen nga paratë kriminale dhe të korrupsionit”, tha Qori.
Në vijim, ai theksoi se ka një pakt mes djajsh në Shipëri, ku politika dhe oligarkët që kontrollojnë ekonominë kanë firmosur për ta shtrirë pushtetin në vetëm 20 duar.
“Të gjitha problemet e qytetit lidhen me rolin uzurpator, tjetërsues, të oligarkisë ekonomike dhe burokracisë politike. Me kalimin e viteve, në Shqipëri duket se është bërë një pakt mes djajsh, midis elitës politike dhe këtij grupimi dominues ekonomik, 15-20 vetë. Të gjithë këta së bashku po e bëjnë qytetin gjithnjë e më pak të jetueshëm. Një arsye më shumë për të ngritur zërin, është për t’u dhënë më shumë kurajo qytetarëve“, u shpreh Qori ndër të tjera.
