Rreth 27 të rinj, kryesisht fëmijë, u plagosën ditën e sotme në Finlandë, kur një urë e përkohshme u shemb pranë një kantieri ndërtimi.
Aksidenti ndodhi rreth orës 9:20 të mëngjesit, sipas orës lokale në Espo, afër kryeqytetit Helsinki, kur dërrasat mbi urë nuk mbajtën dhe grupi ra pesë deri në gjashtë metra në trotuarin e një rruge të vogël anësore.
Shumica e të plagosurve ishin nxënës të klasës së tetë, rreth 14 ose 15 vjeç, të cilët ishin në një udhëtim shkollor, thanë zyrtarët e qytetit. Në mesin e të lënduarve është edhe mësuesi i tyre. 24 persona u transferuan në spitale të ndryshme në rajonin e Helsinkit.
“Askush nuk ka lëndime që rrezikojnë jetën”, njoftoi shërbimi spitalor HUS i Helsinkit, duke shtuar se shumica kishin gjymtyrë të thyera.
“Nuk ka asnjë tregues se ekziston rreziku i paralizës, por ka lëndime në kokë”, u tha gazetarëve drejtori mjekësor i HUS-së, Eero Hirvensalo.
Shkaku i shembjes nuk është konfirmuar dhe është duke u hetuar, njoftuan autoritetet e qytetit Espo.
