Gara presidenciale në Turqi ka marrë një tjetër ritëm, pas tërheqjes së lajmëruar sot nga kandidati Muharrem Ince, i cili i ka dhënë një shtysë më tepër përpjekjejeve të opozitës për të rrëzuar presidentin Rexhep Tajip Erdogan në votimet e së dielës.
Ince, edhe pse me një numër më të vogël mbështetëssish në sondazhe se kandidati kryesor i opozitës, kishte krijuar idenë në opinionin publik se do të ndante votën kundër Erdoganit.
Për këtë arsye në deklaratën e tij të dorëheqjes nënvizoi se po e bën këtë për hatër të atdheut të tij.
“Unë po tërhiqem nga kjo garë. Unë po e bëj këtë për vendin tim”, tha ai në një konferencë shtypi në Ankara, duke shtuar se ishte përballur me një “fushatë shpifjesh”.
Megjithëse emri i Ince do të mbetet në fletëvotim, ai pati një thirrje për opozitën kryesore duke thënë: “Nuk dua të më fajësojnë mua nëse humbasin”.
Partia e tij e qendrës, Atdheu, do të mbetet në garën parlamentare, por Ince nuk mbështeti asnjë nga kandidatët e mbetur në garë.
“I bëj thirrje secilës familje t’i japë Partisë Atdheu të paktën një votë,” tha ai.
59-vjeçari kandidoi për president në vitin 2018, por humbi kundër Erdoganit. Në mars të këtij viti, ai u shkëput nga Partia Popullore Republikane (CHP) e Kilicdaroglu dhe iu bashkua garës presidenciale. Ai fillimisht hodhi poshtë thirrjet e ish-partisë së tij për t’u tërhequr mes shqetësimit se do t’i hiqte votat rivalit të Erdoganit.
