“Nëse SPAK godet Erion Veliajn për korrupsion, a jeni dhe ju përgjegjës?”.
Kjo ishte pyetja më direkte dhe me rëndësi që iu drejtua Edi Ramës sot në “Opinion”, me gazetarin Berat Buzhala që e vendosi kryeministrin përballë faktit se kryebashkiaku i Tiranës është ndër politikanët më të korruptuar dhe hetimet për të mund të nisin së shpejti, njëjtë si për Ahmetajn.
“Për Erion Veliaj thuhet se është i korruptuar. Edhe mediat që nuk janë të afërta me ju, janë të gjitha me Erion Veliajn. Nëse SPAK e godet Erion Veliajn a jeni dhe ju përgjegjës se po mbështesni atë për të qenë kryetar i Tiranës?”, pyeti Buzhala.
Përgjigjia që e pasoi atë nga ana e Ramës për bashkëpunëtorin e tij më të ngushtë ishte e papritur, teksa e barazoi Veliajn, siç ai vetë tha me të gjithë zyrtarët e tjerë të Partisë Socialiste, të cilëve u është dashur ose do t’u duhet të përballen me drejtësinë.
“Qysh ditën e parë që kemi marrë detyrën, kam thënë ata që përsëris sa herë fitojmë një mandat. Vendin ku ulesh ta jep populli, ta jep partia, ta jep kryeministri. Për ta mbajtur do ta mbash vetë. Kemi qëllime të përbashkëkta shumë të qarta. Për to luftojmë bashkë. Unë ju bëhem mburojë, shpatë, shigjetë kujtdo. Por kush mbas shpinës kërkon të bëjë përfitimin e përveçëm duhet të mendohet mirë se betejën me drejtësinë e ka vetë. Kush më ha në shpinë duhet të harrojë se ka mbrojtje nga unë apo PS. Pishën njeriu nuk ja mbaj, por përsa kohë të punojmë bashkë, unë jam mbrojtësi më i madh”, tha Rama.
Mesazhi i fshehur në përgjigjen e shefit të qeverisë për vartësin e tij në Bashkinë e Tiranës ishte më shumë se sa i qartë, duke lënë të kuptohet se në rast hetimesh, për çështje të rëndësishme si afera e Inceneratorëve, ai do ta shesë te drejtësia për të shpëtuar kokën e vetë.
Deklarata e fortë e Ramës vjen në një kohë kur zërat për përplasjen e heshtur në Partinë Socialiste për karrigen e kryetarit është intensifikuar dhe kandidatura e Veliajt nuk është më ajo që bind kryeministrin, pasi në skenë ka dalë edhe emri i Belinda Ballukut.
Pavarësisht kapitalit politik të Veliajt, Rama i bëri bisht pyetjes së dytë të Buzhalës lidhur me kontrollin e frikshëm ndaj mediave që kryebashkiaku i Tiranës ka dhe me të cilin sfidon edhe vetë Ramën.
“Mediat që ju sulmojnë ju nuk e sulmojnë Erionin”, ishte konstatimi i gazetarit, pas të cilit Rama gjeti vendin të kujtonte që s’sheh televizor, por edhe për t’i kujtuar Veliajt se kryeqyteti nuk është vetëm parcelë ekskluzive e tija.
“Sinqerisht unë nuk i ndjek mediat. Ka bërë një sistem drejtoria e komunikimit, një aplikacion që sjell të gjitha lajmet. Futa atë aplikacion sikur futa shejtanin në bark. Buletini. Një aplikacion që më sjell gjith lajmet, sikur futa shejtanin në bark.
Nuk e ndjek sa është ai në media. Erjoni për mua është kryetari i bashkisë që i duhet Tiranës. Ai ka parcelën e vetë të ekzekutimnit të gjërave, unë kam timen. Kryeqyteti nuk është thjesht i kryetarit të bashkisë, por edhe i qeverisë”, u shpreh Rama.
