“Edi Rama ka vjedhur Korçën me Filon dhe Peleshin më shumë se çdo regjim tjetër. Ka vjedhur dhe ka abuzuar miliarda e miliarda euro”.
Me këto fjali e nisi Sali Berisha takimin përmbyllës të fushatës elektorale për zgjedhjet lokale të 14 Majit në Korçë, aty ku kërkoi votën për kandidaten e koalicionit “Bashkë Fitojmë”, Ledina Aliolli.
Kryedemokrati deklaroi nga Korça se këto zgjedhje vendore janë të rëndësishme pasi vendosin për fatin e demokracisë, ndaj qytetarët duhet t’i drejtohen kutive të dielën.
“Katër ditë na ndajnë nga dita që ne me votën tonë do firmosim në një mision historik, ndryshimin e madh. Do firmosim fitoren e Ledina Aliollit, do firmosim fitoren e pluralizmit, do firmosim rikthimin e lirisë dhe dinjitetit.
Zgjedhjet vendore kësaj radhe janë zgjedhje për fatin e demokracisë shqiptare, ndaj dhe unë kam bindjen më të madhe se idealistët, të cilët u ngritën fuqishëm në këtë fushatë si asnjëherë më parë, do triumfojnë me 14 maj.
Këtu në Korçë, fitorja merr një dimension edhe më të shndritshëm, edhe më të shkëlqyer. Sepse këtu kryebashkiake do jetë Ledia Aliolli, një bijë e shquar e Korçës, një intelektuale e shkëlqyer, një familjare shembullore.
Por një politikane e re, e cila ka një dashuri të madhe për Korçën, për qytetarët, rrugët dhe rrugicat e saj. Ajo paraqiti këtu një projekt, më të shkëlqyerin që Korça mund të ketë dëgjuar ndonjëherë”, tha Berisha.
Më tej, ai renditi disa nga arsyet përse kryebashkiaku i Korçës, Sotiraq Filo nuk pranon të dalë në një debat me rivalen demokrate për bashkinë, duke i përmendur vjedhjen e tenderave dhe lejet për resorte dimërore.
“Edi Rama nuk lejon Filen e tij të ballafaqohet me Ledina Aliollin. Nuk lejon kandidatët e tij të ballafaqohen me kandidatët e primareve. Kjo sepse ata kanë tmerr nga vetja e tyre. Ata janë zhytur në krime të tmerrshme ekonomike, vjedhje pas vjedhje, përvetësim pas përvetësimi.
Ata nuk paraqesin projekte sepse kanë vetëm mashtrime. I përgëzoj qytetarët e Korçës që kanë refuzuar takimet me Filen. Ftoj të gjithë shqiptarët të refuzojnë takimet me kandidatët e territ dhe bodrumit.
Nuk del dot Filja sepse ka firmën dhe paratë në resortet e Moravës dhe resortet e tjera. Nuk del dot Filja sepse e jep pyllin publik për prerje me 5 mijë lekë metrin dhe e shet me sekserët e tij 70 mijë lekë metrin e druve.
Nuk del Filja se me Ramën dhe Peleshin e tij, 8kanë zhytur Shqipërinë në një borxh të tmerrshëm. Nuk del Filja se ka mashtruar për aeroportin e Korçës. Ç’punë ka Filja me Korçën? Aq sa ka punë një hajdut ordiner”, tha Berisha.
