Nga Boldnews.al
Temperatura e ajrit në Tiranë është rritur ndjeshëm këto ditët e fundit, për shkak të nxehtësisë që lëshon zifti elektoral i hedhur nga Bashkia e Tiranës në rrugica të ndryshme të qytetit, në prag të zgjedhjeve vendore të 14 Majit 2023.
Bashkia e drejtuar nga Erion Veliaj ka shpenzuar mbi 10 milionë euro vetëm në javët e fundit, në përpjekje për t’i treguar qytarëve se administrata e tij është në krye të punëve.
Kontratat e ziftit elektoral janë të gjitha me afat 1-mujor, gjë që forcon gjithnjë e më shumë dyshimet se i gjithë ky shpenzim është në funksion të propagandës elektorale të Veliajt, i cili tenton të marrë një mandat të tretë në krye të Bashkisë së Tiranës.
Këto lloj punimesh, në të shkuarën kanë rezultuar jo cilësore dhe, natyrisht, edhe kësaj radhe nuk do të bëjnë ndonjë ndryshim, nisur sidomos nga shpejtësia e veprimeve.
Megjithatë, dhjetra tenderat e asfaltit elektoral të Veliajt janë një mënyrë e mirë për t’u dhënë qindra milionë lekë edhe kompanive të ndërtimit, sidomos atyre që janë “klientë të rregullt” të qeverisë dhe bashkisë së Tiranës.
“Boldnews.al” ka kryer nje verifikim mbi fituesit e tenderave të ziftit elektoral, të zhvilluar në dy muajt e fundit nga administrata e Erion Veliajt.
Në listën e fituesve kryesorë gjenden, ndër të tjerë, edhe kompania “Salillari” e Pëllumb Salillarit, si edhe “Arb-Trans 2010” e familjarëve të zyrtarit bashkiak, Arben Maloku, të cilat u kapën në flagrancë nga vetë qeveria duke ndërtuar kate pa leje në godinat e tyre, përkatësisht në Liqenin e Thatë dhe në rrugën “Myslym Shyri”.
Por këto dy kompani, në vend që të përballen me përgjegjësi penale për ndërtim të paligjshëm me qëllim përfitimi, ato renditen në grosistët kryesorë të tenderave për ziftin elektoral të Veliajt.
Më poshtë gjendet lista e plotë e kompanive që kanë përfituar nga “torta e ziftit” të Erion Veliaj. Renditja është bërë sipas vlerës monetare të përfituar nga kompanitë.
- Bashkimi i operatorëve “Ndërtimi” & “Ndregjoni” & “Elmazaj Konstruksion” ka fituar 10 kontrata me emërtim “sistemim-asfaltim rruge” në Tiranë, për një vlerë totale prej 148.873.926 lekë të reja.
- Kompania “Albstar” ka fituar 15 kontrata për “ziftin elektoral” të Erion Veliaj, me një vlerë totale prej 131.696.845 lekë të reja.
- Bashkimi i operatorëve “Shpresa -Al” dhe “Stërkaj” ka fituar 8 kontrata për “zift”, me vlerë totale 100.692.152 lekë të reja.
- Kompania “Salillari” e Pëllumb Salillarit ka fituar 8 kontrata në tenderat për zift elektoral të zhvilluar nga Erion Veliaj, për një vlerë totale prej 92.345.886 lekë të reja.
- Kompania ndërtuese “Geci”, e cila po ndërton edhe një kullë në qendër të Tiranës, ka përfituar 8 kontrata për zift elektoral të Veliajt, me një vlerë totale prej 89.998.380 lekë të reja.
- Kompania “Bami” ka fituar 13 kontrata për zift elektoral, për një vlerë totale prej 82.952.824 lekë të reja.
- Bashkimi i operatorëve “Kronos Konstruksion” & “Mane/S” & “Arb-Trans 2010”, kjo e fundit në pronësi të familjarëve të zyrtarit bashkiak, Arben Maloku, kanë përfituar 11 kontrata për zift elektoral të zhvilluar nga institucioni i drejtuar prej Erion Veliaj. Vlera totale e përfituar prej tyre në këto tendera është 75.559.005 lekë të reja.
- Top-listën e tenderave të Veliajt me objekt “sistemim-asfaltim rrugësh” të zhvilluar në këto javët e fundit e mbyll kompania “GPG Company”. Ajo ka fituar 7 kontrata për zift elektoral, për një vlerë totale prej 56.080.350 lekë të reja.
