Inflacioni po zbutet, por kjo nuk po përkthehet në xhepat e qytetarëve. Përkundrazi, ata i druhen çdo ditë etiketave të ushqimeve si frutat dhe perimet.
“E lidhin me naftën apo krizën në Ukrainë situatën, u ngritën çmimet andej u ngritën dhe këtej, ra çmimi i naftës andej, por këtu çmimet e tjera nuk ndryshojnë më të zbresin disa vlera më poshtë”, shprehet një qytetar.
Më të prekurit nga kjo situatë ndihen pensionistët të cilët edhe me indeksimin e vjetshëm të pensionit, por dhe bonuset e dhëna nga qeveria, nuk arrijnë t’i përballojnë çmimet e larta.
“Më pak s’do blejmë, por do shtrëngohemi te një produkt tjetër duke mos e blerë.”
“Ata e rritën pensionin nga ana tjetër, këta i ngrenë më shumë çmimet e fruta-perimeve.”
Ndër produktet më të shtrenjta janë bulmeti dhe mishi, për të cilat qytetarët thonë se janë detyruar t’i konsumojnë pak.
“Perimet ulen tani se ka më shumë prodhim, por prapë nuk merret vesh çdo bëhet, por këtu nuk ndryshon lehtë një gjë. Djathi 1kg, 1400 lekë, imagjino të marrësh gjysmë kile 750 lekë, shumë e shtrenjtë e marrim me pikatore.”
Nga ana tjetër, tregtarët me ardhjen e sezonit të verës flasin për një përmirësim të çmimeve pasi produktet vendase pritet të furnizojnë një pjesë të mirë të tregjeve.
“Krahasuar me një muaj më parë çmimet janë gjysmë për gjysmë. Po të krahasosh sa ishte domatja 300 lekë greke dhe italiane tanimë është 150 lekë. Është koha stina që ka prodhim vendi sa të duash dhe ulen çmimet.”
Grupi i ushqimeve vijon të mbetet një nga ndikuesit kryesorë tek inflacioni, duke rënduar te buxhetet familjare me 4 mijë deri në 6 mijë lekë më shumë çdo muaj.
Ndërsa viti 2023 ka reflektuar uljen e produkteve energjetike, produktet e shportës, për të cilat u krijua edhe bordi i rregullimit të çmimeve vijojnë të jenë të kushtueshme.
Sipas pikave të shumicës mielli vazhdon të jetë 25% më i shtrenjtë se në 2021-in, sheqeri 40% më shtrenjtë ndërsa për makaronat shtrenjtimi arrin në 35%. Ekspertët vlerësojnë se për këto produkte kontrolli duhet të jetë i rreptë nga autoritetet.
“Nënçmimi i euros dhe ulja e çmimit të këtyre produkteve nuk ka reflektuar në uljen e vërtet të çmimeve të tregut për këto produkte por ka ndikuar në rritjen e marzhit të fitimit të tregtarëve që normalisht është abuzive por mendojë që do të ishte mirë që autoriteti konkurrencës të hetonte me qëllim që në raste të tilla të mbrojë konsumatorin shqiptar”, shpjegon ekspertja e ekonomisë, Romina Radonshiqi.
Sipas statistikave të INSTAT, grupi i ushqimeve u rrit me 3,4% në muajin prill, ndërsa nëngrupi grupi i drithërave pësoi rritje me 5%. Koston më të madhe në tryezën e familjeve shqiptare vijon ta ketë veza, qumështi dhe djathi me rritje 15%, ndërsa në fillimvit rritja për këtë kategori ishte deri në 28%.
