Në prag të zgjedhjeve lokale të 14 Majit, krydemokrati Sali Berisha ka deklaruar se kryeministri Edi Rama do të dënohet me burg në Amerikë dhe për këtë e ka vënë në dijeni i dërguari i SHBA-ve Gabriel Escobar, në vizitën e tij të fundit në Tiranë.
Berisha tha sot në “Open” se për Ramën ka të hapur një çështje penale në SHBA dhe ai do të ketë fatin e ish-agjentit të FBI-së Charles McGonigal.
“Po e pret në bankën e të akuzuarve miku i tij McGonigal”, tha Berisha, teksa shtoi se kjo ngjarje ka qenë aq e rëndë sa në vizitën e tij në Shqipëri, Escobar, i ka komunikuar Ramës se është në hetim.
“Çdo patriot nuk mund të votojë Ramën. Po të ishte për votën e lirë ai do ishte në kokërr të burgut. Atë e pret McGonigal në bankën e të akuzuarit. Aq sa do dënohet Charles aq do dënohet dhe Edi në Amerikë. Zhvillimi i rëndë ka qenë mesazhi që i solli Escobar Ramës. E bëri për të zgjuar komentin e shoqërisë, e takoi vetëm 20 minuta. Mesazhi ishte se është nën hetim për çështje penale me McGonigal. Ai nuk nxori asgjë nga takimi dhe kur u pyet në media, Escobar tha që çështja është e hapur dhe nuk mund të komentojë. Ramën do e ekstradojmë ne, nuk diskutohet.
AI është i tmerruar nga ajo histori. Ndaj ai humbet herë herë dhe përfytyron veten në ishullin Riker, ka një burg të tmerrshëm qindra-vjeçar aty dhe janë varrezat e gjithë banditëve amerikanë. Edi Rama mund të përfundojë aty si VIP”, u shpreh ai.
