Nga Boldnews.al
Thonë që kush ka një mik, ka një thesar. Thonë edhe gjithashtu se kush ka mik kryeministrin, ka rrugë të hapura në biznes. Por, kush e përdor veten për të luajtur rolin e aktorit në podcast-in elektoral “Flasim” të Edi Ramës, ka fat shumë të madh.
Kjo i ka ndodhur biznesmenit nga Lushnja, Agim Xhindoli. Pak ditë më parë, ai ishte i ftuar në studion “private” intervistuese të kryeministrit, të cilën e ka hapur së fundmi, në funksion të fushatës elektorale për zgjedhjet vendore.
Rama e paraqiti Xhindolin si një biznesmen të suksesshëm, i cili ka përballuar sfidat dhe vështirësitë në ngritjen e aktivitetit privat.
Nga ana e tij, biznesmeni Xhindoli dëgjoi arritjet dhe sukseset e shumta të qeverisë “Rama” për minuta e minuta të tëra. Natyrisht, durimi për të dëgjuar kryeministrin, meriton edhe një “shpërblim”. Një “shpërblim” nga ato që nuk harrohen lehtë.
Vetëm 48 orë pas intervistës në “Podcast”, kryeministri Edi Rama nënshkroi lejen për ndërtimin e një parku fotovoltaik, në favor të një prej kompanive të Agim Xhindolit.
Në datën 4 Maj 2023, në faqen zyrtare të Këshillit të Ministrave, u publikuan disa vendime qeveritare.
Në krye të listës gjendet vendimi: “Për miratimin e ndërtimit të centralit gjenerues të energjisë elektrike fotovoltaike dhe veprave ndihmëse, i cili nuk është objekt koncesioni, në zonën kadastrale nr. 1020, fshati Allprenaj, Njësia Administrative Golem, Bashkia Lushnjë, qarku Fier, nga shoqëria “5GX ENERGY” sh.p.k”.
“Boldnews.al” kreu verifikime mbi kompaninë përfituese. Sipas të dhënave të Qendrës Kombëtare të Biznesit, shoqëria “”5GX Energy” shpk është në pronësi të Agim Xhindoli, pra biznesmenit që dëgjoi me durim për më shumë se gjysëm ore mbi arritjet spektakolare të qeverisë së Ramës.
Kompania përfituese e centralit fotovoltaik është krijuar në Shtator të vitit 2022. Objekti i veprimtarisë së saj është “implementimi dhe menaxhimi i projekteve gjeneruese (fotovoltaike, eolike, hidrike) te energjise elektrike”.
Agim Xhindoli dhe familjarë të tij rezultojnë pronarë në të paktën 7 kompani, shumica e të cilave janë krijuar rishtazi muajt e fundit, përfshirë edhe “5GX ENERGY” sh.p.k” që përfitoi lejen e centralit fotovoltaik
Dy kompani të tjera të familjes, konkretisht “Park Sol Energy” dhe “Sunray Energy” kanë gjithashtu objekt të aktivitetit të tyre ndërtimin e centraleve fotovoltatike.
