Lideri i opozitës Sali Berisha nga takimi elektoral që zhvilloi në mesditë në Has, ka njoftuar edhe datën kur do të zhvillohet mitingu përmbyllës i fushatës së koalicionit “Bashkë Fitojmë”, për zgjedhjet e 14 Majit.
Berisha i ftoi të gjithë shqiptarët që më 12 maj t’i bashkohen atij dhe 61 kandidatëve të opozitës në sheshin “Nënë Tereza” në Tiranë, për të festuar , sipas tij, fitoren e datës 14.
“Me datën 12 maj, në ora 7, ftoj banorët e Hasit, Tropojës dhe të gjithë Shqipërisë, të mblidhemi dhe të festojmë fitoren e datës 14 në Tiranë në sheshin Nënë Tereza”, tha ai.
Më tej Berisha i kërkoi kryebashkiakut të Hasit që të heqë dorë nga këto zgjedhje pasi është turpëruar duke shpërndarë thasë me miell, për të kërkuar vota në këmbim.
“Votoni numrin 1, koalicionin ‘Bashkë Fitojmë’. Votoni Miftar Dautin, kandidatin e fitores. I bëj thirrje Beqirit dhe Halitit. Tani, zoti Mula, deri tani ka qenë me dy emra. Këto ditë u bëre me dy mbiemri, edhe Mula dhe Mielli. Jep dorëheqjen se je turpëruar. Ty Rama të përdor si vegël. Mos u bëj mashë e tij, se të jap fjalën se me datë 15, Rexha, ti dhe Gjici do krijoni partinë e pabesisë. Ndaj dhe ju uroj nga zemra, fitore, fitore, fitore!”, tha Berisha.
