Milionat e shpenzuara për kontratat koncesionare të “rrugëve të florinjta” të qeverisë Rama, ishin kryefjala e një tjetër takimi elektoral të liderit opozitar Sali Berisha gjatë ditës së sotme.
Kryedemokrati teksa u ndal në Has për të prezantuar kandidatin e koalicionit “Bashkë Fitojmë”, për zgjedhjet lokale të 14 majit, u shpreh se qeveria Rama ka vjedhur shqiptarët duke bërë investime përtej kostove.
Ai nënvizoi faktin se për ndërtimin e rrugëve në fushë, është shpenzuar 12 herë më shumë se në Gjermani.
“Investimet në punë publike janë vjedhur nga Ram e qeveritarët e tij. Ka ndërtuar rrugë në fushë me dyfishin e çmimit të tunelit të Elbasanit, me 10-12 herë me shtrenjtë se në Gjermani. Ndërton shkolla me 7 mln euro. Të gjitha këto janë paratë tuaja”, tha Berisha.
Më tej, ai komentoi edhe mënyrën si Rama po ua kërkon votën shqiptarëve me një model “tallava”, duke thënë se kryeministri përdor gjuhë halabaku në mënyrë që të fshehë vjedhjet e tij.
“Më 14 maj të votojmë ndryshimin, për shpëtimin e Hasit dhe Shqipërisë. Ju e shihni fushatën e tij, kalon nga takimi në takim me një gjuhë të denjë për një halabak, përdor fjalë të turpshme, sepse e di që qytetarët i ka vjedhur, i ka varfëruar, i ka përzënë nga vendi i tyre, dhe thotë më mirë të më thonë halabak e i pacipë, se sa të thonë i kam vjedhur. Por më 14 maj do e ndëshkojmë për krimet që ka kryer”, u shpreh Berisha.
