Serbia është tronditur sërish nga një masakër e ndodhur këtë herë në fshatin Dubonë, pranë Mlladenovcit, ku një 21-vjeçar i identifikuar si Uros B. ka qëlluar me armë zjarri nga një veturë në lëvizje duke vrarë 8 persona dhe ka lënë të plagosur 13 të tjerë.
Kjo ishte masakra e dytë e ndodhur në Serbi në 48 orët e fundit, pasi një 14-vjeçar të mërkurën, vrau tetë nxënës dhe një rojë të sigurisë në një shkollë në qendër të Beogradit.
Mësohet se vrasja masive ka ndodhur sërish pas një diskutimi në shkollë. Uroš ishte në oborrin e shkollës me shokët e tij kur u konfliktua me një polic dhe më pas shkoi në shtëpi, mori armën dhe filloi t’i vriste të gjithë me radhë.
Sipas nova.rs ai qëlloi me një armë automatike në tre lokacione të ndryshme, duke lënë të vdekur tetë persona në fshatin Dubonë, që ndodhet 60 km (37 milje) në jug të Beogradit.
Nga të shtënat raportohet se kanë mbetur të vrarë një polic dhe motra e tij, ndërsa identiteti i viktimave të tjera nuk dihet.
Uroš B. është larguar nga vendi i ngjarjes dhe kërkimet për të vazhduan gjatë gjithë natës. Rreth 600 pjesëtarë të njësive speciale me ndihmën e helikopterëve dhe droneve u vunë në kërkim të agresorit.
Fotot nga vendi i ngjarjes tregojnë oficerët e policisë që ndalojnë makinat në postblloqe ndërsa përpiqen të lokalizojnë personin e armatosur.
View this post on Instagram
Pas 8 orësh ndjekje, i riu u vu në pranga në Kragujevc. Tashmë pritet shoqërimi i tij në komisariat dhe marrja në pyetje nga efektivët për të kuptuar rrethanat në të cilat ndodhi masakra dhe arsyet që e shtyn të vriste 8 persona.
Ministrja e Shëndetësisë, Danica Grujiçiç, dhe kreu i Agjencisë së Inteligjencës së Sigurisë, Aleksandar Vulin, thuhet se kanë udhëtuar në zonë në orët e para të së premtes.
View this post on Instagram
Ngjarja vjen vetëm pak orë pasi Serbia shpalli tre ditë zie kombëtare për masakrën që kreu adoleshenti Kosta K.në shkollën në Beograd.
Sulmi bëri gjithashtu që qeveria e Serbisë të propozojë kufizime më të ashpra për posedimin e armëve.
View this post on Instagram
Të shtënat masive janë relativisht të rralla në Serbi, por zotërimi i armëve në vend është ndër më të lartit në Evropë. Tashmë me dy masakra në harkun e 48 orëve bilanci arrin në 17 viktima dhe mbi 25 të plagosur.
