Deputeti i LZHK-së Dashamir Shehi, në një lidhje skype me MCN Live nga Rrësheni ku ndodhet në një takim elektoral ka komentuar lidhur me ecurinë e zgjedhjeve të 14 majit. Ai tha se mbetet pozitive fakti që deri tani kemi pasur një fushatë të qetë duke uruar që të jetë kështu pa dhunë dhe përplasje deri ditën e fundit. Shehu ftoi qytetarët që të shkojnë të votojnë të lirë për kandidatin e tyre, ndërsa theksoi se opozita ka mundësi të fitojë Tiranën, Durrësin dhe Elbasanin.
“Jam në Rrëshen dhe kemi një djalë shumë të mirë si kandidat për bashkinë dhe besoj se do të fitojmë. Këto lloj zgjedhjesh kanë anë pozitive dhe negative. Ana pozitive është se kemi një fushatë të qetë dhe uroj të jetë kështu deri në ditën e fundit, që shqiptarët të shkojnë në kutitë e fundit pa dhunë dhe përplasje. Ana negative është se këta kanë mobilizuar të gjithë nëpunësit administrativ, paratë, premtimet dhe grupet me influencë po përdoren, por kam bindjen se opozita në shumatoren e tyre, të gjithë partitë së bashku do arrijnë ta kapërcejnë 50% duke dhënë një sinjal mjaft pozitiv që shumica e shqiptarëve janë në frontin opozitar dhe kjo është shumë e rëndësishme. Kjo është arsyeja pse i ftoj qytetarët të shkojnë të votojnë kë ata dëshirojnë sepse qëllimi ynë kryesor është rrëzimi i qeverisë Rama”, tha Shehi.
Në vijim, ai theksoi se aty ku opozita përfaqësohet nga një kandidat i vetëm ata kanë shkuar duke i dhënë mbështetjen e tyre të madhe, ndërsa sipas tij aty ku ka dy kandidatë Shehi shprehet se ja kanë lënë në dorë popullit opozitar të bëjë zgjedhjen e vetë.
“Mendoj që është e rëndësishme që një pjesë të bashkive ta fitojmë dhe kjo është e mundur. Shpresojmë se fitojmë një pjesë të madhe të qyteteve të mesme, ne kemi nevojë të japim një sinjal në Tiranë, Durrës, Elbasan atje ku është ndarë ekuilibri mes partive të ndryshme. Kemi dhe një javë kohë dhe e di që nuk jemi në një mendje brenda kampit tonë opozitar, por të gjitha me rëndësi është që në 14 maj opozitarët duhet të jenë më shumë se grupi i Ramës. Në këtë mënyre shqiptarëve u kthehet pluralizmi në qytet. Kemi nevojë për një rezultat pozitiv si për bashkitë, por dhe për atë proporcional sepse ai tregon se sa është potenciali opozitar. Të gjitha zgjedhjet janë një shans, tani le të shtrëngojmë radhët gjithsecili pranë partisë së vetë dhe të shkojmë të mbështesim kandidatët proporcional dhe besoj se rezultati do jetë pozitiv. Më pas opozita ka nevojë për një reformim të madh sepse nuk mund të vazhdohet më me këtë situatë”, u shpreh.