Në Përvjetorin e 110-të të themelimit të Gjykatës së Lartë, një ekspozitë e punuar nga nxënësit e disa shkollave 9-vjeçare dhe gjimnazeve në kryeqytet do të hapet në datat 5 dhe 6 maj, në ambientet e jashtme të institucionit.
Ekspozita e titulluar “Drejtësia në sytë e një piktori” do të jetë e hapur për publikun dhe përveç pikturave do të ofrojë edhe një sërë dokumentesh historike të siguruara në bashkëpunim me Drejtorinë e Përgjithshme të Arkivave.
Në këto dokumente pasqyrohen foto dhe akte juridike që datojnë në periudha të ndryshme gjatë historisë 110 vjeçare të Gjykatës së Lartë.
Ekspozita është realizuar në bashkëpunim me Zyrën Arsimore të Tiranës dhe për të kanë punuar nxënësit e Liceut Artistik “Jordan Misja”, gjimnazit “Sami Frashëri” dhe shkollave 9 vjeçare “Jeronim de Rada”, “Mihal Grameno”, “Kosova”, “Osman Myderizi” dhe “Vasil Shanto”.