Kreu i Lëvizjes BASHKË, Arlind Qori teksa ishte i ftuar në emisionin “Top Story” mbrëmjen e djeshme ka prezantuar 6 pikat kryesore të programit të tij për Tiranën, në kuadër të kandidaturës së tij për kryebashkiak në zgjedhjet lokale të 14 Majit.
Lejet e ndërtimit dhe betonizimi në kryeqytet janë në fokusin e Qorit, i cili propozon një plan të ri urbanistik për Tiranën dhe nënvizon se do të hetohet ndërtimi i kullave në qendrën historike, sipas ligjit urbanistik të vitit 2014, para se Erion Veliaj të zgjidhej kryebashkiak.
Ndër të tjera në programin e Lëvizjes BASHKË për drejtimin e theksohet se duhet të aplikohet taksa për individët që zotërojnë dy ose më shumë banesa, në mënyrë që të çlirohet tregu imobilar dhe të bëhet më i aksesueshëm nga çiftet dhe familjet e reja.
PROPOZIMET:
- Një plan i ri urbanistik që i jep përparësi hapësirave publike, zgjerimit të rrugëve dhe çlirimit të trotuareve, përkundër planit aktual që e thellon xhunglën e betonit.
- Me Lëvizjen BASHKË! në krye të Tiranës do të hetohen nëpërmjet ligjit të urbanistikës të 2014 të gjitha kullat në qendrën historike të Tiranës. Çdo kullë në shkelje të ligjit, sidomos ajo pas Sahatit, ose do sekuestrohet në dobi publike ose do shembet. Qytetarët do ta vendosin me referendum lokal këtë.
- Tatim mbi banesën e tretë, të katërt e kështu me radhë, bosh dhe të blera zakonisht nga paratë e drogës dhe të korrupsionit si shpëlarje dhe stacionim i parave të pista, çka krijon një treg imobilar kaotik/spekulativ dhe rrezikun e një qyteti fantazmë. Taksa do ta çlironte tregun dhe do t’i ulte çmimet.
- Do të ndërtohen minimalisht 20 shkolla të reja. Sot në 40 shkolla të Tiranës bëhet mësim me dy turne. Në shkolla do të vendoset mësimi me orare të zgjatura ku fëmijët nuk do të degdisen në rrugë ose kurse me pagesë si sot, por do të hanë një vakt në shkollë dhe do të socializohen atje.
- Përmirësim i cilësisë së ujit dhe e drejta e ujit të pijshëm do të jetë detyrim për çdo kafene, restorant dhe shërbim tjetër.
- 1 në 5 lekë vidhet. Ne nuk do të vjedhim. Ne do të vendosim shembullin e nënpunësit publik që jeton përmes rrogës së tij.
