Superliga e basketbollit të meshkujve në vendin tonë do të mësojë mbrëmjen e sotme kampionin e sezonit 2022/2023, teksa Besëlidhja po përballet me Tiranën në finalen e pestë dhe të fundit, që do të përcaktojë fituesin e madh.
Deri më tani gjithçka është e barabartë, me të dyja ekipet që kanë arritur të fitojnë nga 2 përballje, ndërsa sfida e sotme ka ndezur pallatin e sportit “Asllan Rusi” me qindra tifozë të pranishëm.
Nuk mungojnë edhe momentet e tensionit, teksa nga videot e mëposhtme fillimisht shihet një prej zyrtarëve të ekipit lezhjan i cili i drejtohet me fjalë banale gjyqtarëve të finales së madhe duke ushtruar presion verbal.
Ndërsa pak minuta më pas tifozët lezhjanë dalin jashtë kontrollit duke goditur me sende të forta në drejtim të stolit bardheblu.
Në këtë moment loja u ndërpre dhe u desh edhe ndërhyrja e forcave të rendit për të vendosur qetësinë dhe për të vijuar sfidën, pasi basketbollistët e Tiranës kishin shkuar në dhomat e zhveshjeve në këto minuta të tensionuara.
Për “lezhjanët” një fitore ditën e sotme do të shkruante historinë, pasi do të ishte titulli i parë kampion që fitohet nga klubi, ndërsa për “bardheblutë” ky do të ishte titulli i 21-të.
