Të gjitha posterat e subjekteve politike në të gjithë Shqipërinë pritet që të hiqen brenda së premtes, sipas një urdhri të lëshuar sot nga Komisioni Qendror i Zgjedhjeve.
Në mbledhjen e KQZ u nënvizua se asnjëra prej partive politike dhe koalicioneve nuk i ka plotësuar kërkesat dhe kushtet që parasheh Kodi Zgjedhor, pasi posterat e tyre nuk përmbajnë shënimin “prodhuar nën përgjegjësinë ligjore të partisë përkatëse”.
“Ju dhamë kohë ta vendosnin këtë shënim. Nga verifikimi ynë rezulton se jo të gjitha materialet e përmbajnë këtë shënim”, thuhet në shqetësimin që u ngrit nga Administrata e KQZ-së.
Në këto kushte, kryekomisioneri Ilirjan Celibashi i ka kërkuar Policive Bashkiake dhe asaj të Shtetit që të heqë posterat në të 61 bashkitë e vendit.
Celibashi tha në fjalën e tij se posterat duhet të hiqen brenda ditës së premte të kësaj jave.
“Ne do urdhërojmë të hiqen materialet propagandistike të kujtdo subjekti zgjedhor që s’përmbajnë shënimin “Prodhuar nën përgjegjësinë ligjore të subjektit zgjedhor. Urdhërohet policia bashkiake të heqë këto postera. Deri në orën 24:00 të ditës së premte të kësaj jave do duhet të marrim informacion nga drejtuesit respektiv të policisë bashkiake dhe të shtetit mbi zbatimin e vendimit”,- tha Celibashi.
