Kryetari i PD-së Sali Berisha tha këtë të mërkurë në një emision televiziv se qeveria ka nisur përpjekjet për të blerë vota për lokalet e 14 majit. Sipas Berishës, një nga format është disbursimi i fondeve para zgjedhjeve.
“Belina lluksi (Belinda Balluku) po kryeson fushatën e vjedhjes së votave. Kam dokumentin nga thesari i shtetit. Vetëm në rrethin e Dibrës ka dizbursuar 400 mln lekë pagesa paaftësie këtë javë. Nëse shpërndan bonus para zgjedhjeve, synimi është blerja e votave. Janë disbursuar 5 mijë leke për çdo pensionist”, tha Berisha.
Më tej, ai tha se kandidati i mazhorancës për Elbasanin, Gledjan Llatja është vërsulur si i tërbuar ndaj votës së lirë. “Ai del njeri pa strehë, del njeri që s’paguan qera kurrkund dhe del njeri me 100 mijë euro pa burim pasurie”, tha Berisha duke iu referuar një deklarate të pasurisë së Llatjas publikuar në media.
Një tjetër formë e blerjes së votave, deklaroi Berisha, është asfalti elektoral.
Megjithatë, ai u shpreh se opozita do të dalë triumfuese në këto zgjedhje.
Berisha tha se do të jenë në terren për të mbrojtur çdo votë.
“Çfarë do bëjmë ne, ne jemi aty në çdo moment, në çdo sekondë, do jemi aty. Nuk jemi me armë, por jemi aty, në krye të detyrës. Në mënyrë absolute ne kemi vetëm një mision; rikthimin e votës së lirë te shqiptarët. Kush është Edi Rama për votën e lirë po e fakton çdo ditë. Nëse ne nuk do ishim të pranishëm, ne përjashtonim veten nga e drejta e reagimit”, tha ai.
