Vrasja e biznesmenit Ardian Nikulaj, brenda lokalit të tij në Shëngjin, solli dhe ngujimin e familjarëve të ‘porositësit’ Etmond Haxhia.
Por mësohet se familja Nikulaj e ka lënë pas kanunin dhe ka nxjerrë nga ngujimi familjarët e Haxhisë.
Për të shmangur një tjetër tragjedi të mundshme, familja kërkon që ngjarja dhe historia që vijon prej vitesh, të zbardhet nga drejtësia, duke lënë pas kështu gjakmarrjen që ishte krijuar mes dy fiseve që në vitin 1997.
Ndërkohë, Edmond Haxhia, Thomas Mithan, Steven Hunt, Harriet Bridgeman të akuzuar si bashkëpunëtorë e informatorë në lidhje me vrasjen janë vënë në pranga në Londër dhe brenda datës 5 maj, Shqipëria duhet të përkthejë në anglisht provat dhe t’ia dërgojë Britanisë së Madhe për të bërë të mundur ekstradimin e tyre. Ndërsa në kërkim vijojnë Ruben Saraiva dhe Harry Simson.
Vrasja u zbardh vetëm një javë pasi ndodhi. Edmond Haxhia akuzohet se solli në Tiranë 4 britanikët e portugezin për të mbyllur hesapet e gjakmarrjes që kishte të hapura me fisin Nikulaj. Haxhia është kushëri me vëllezërit Lestakaj që jetojnë në Londër dhe akuzonin Nikulajn se u kishte vrarë xhaxhain dhe nipin.
