Kryetari i Partisë së Lirisë i ftuar në emisionin ‘Të Paekspozuarit’ në MCN TV deklaroi se pritshmëritë e koalicionit ‘Bashkë Fitojmë’ në zgjedhjet e 14 majit janë të jashtëzakonshme.
Ai tha se sot dy javë ky regjim monist ku një parti kontrollon 100% bashkitë ka përfunduar kështu që sipas tij ky është një lajm i mirë për të gjithë shqiptarët, jo vetëm për opozitën.
“Pas dy javësh, nuk do të ketë më një shpërdorim të taksave. Së dyti, jam i bindur që sot dy javë korrupsioni absolut zëvendësohet me transparencë absolute. Nuk do të ketë më mbledhje të këshillave bashkiakë fshehurazi, vendosje taksash fshehurazi, çdo gjë do të jetë para mediave dhe qytetarëve në mënyrë që të garantojmë një transparencë absolute dhe këto nuk janë pak. Këto janë në interes të të gjithëve”.
Në vijim ai sqaroi strukturën e shpenzimeve në Bashkinë e Tiranës se si ka qenë në 2016 dhe si është sot.
“Janë shtuar shpenzimet për ahengje për paga. Investimet nga 34% në 2016 kanë përfunduar në 18%. Në 2016 kishte 4 mijë të punësuar, sot ka 8 mijë. Shkodra do të votojë këtë. Ky i hoqi Shkodrës drejtorinë e Arsimit. I ka hequr arkivën, drejtorinë e ujërave, çfarë t’i thotë Shkodrës ai”.
