Autoritetet portuale në Durrës zbuluan ditën e djeshme një ngarkesë prej 13 kilogramë e 750 gramë heroinë, të fshehur në një strukturë metalike të krijuar enkas për fshehjen e drogës, në pjesën e pasme të një autobusi të linjës Durrës-Milano.
Efektivët e policisë prenë me troko pjesën metalike, duke gjetur heroinën e ndarë në 26 pako të mbështjella me natriban, e cila u sekuestrua në cilësinë e provës materiale.
Në flagrancë u arrestua pronari i firmës së linjës së autobusëve Durrës-Milano, Mikel Pici, të cilit gjatë kontrollit fizik iu gjet edhe kokainë, si edhe shoferi i autobusit Piro Rrushi.
Të dy personat e vënë në pranga kanë mohuar të kenë lidhje me ngarkesën e gjetur në autobus dhe kështu 13 kilogramët e heroinës pas 24 orësh vijojnë të mbeten pa pronar.
Në deklaratën e tij të parë përpara grupit hetimor drejtuesi i mjetit , 57-vjeçari Piro Rrushi mohoi se ai kishte dijeni se lënda narkotike ndodhej në autobusin e linjës Durrës-Milano, që ai po dejtonte.
Nga ana tjetër pronari i linjës së autobusëve, 32-vjeçari Mikel Pici, pasi mohoi gjithçka në fillim, më vonë zgjodhi që në këtë pikë të hetimeve të mbrohej në heshtje.
Sakaq, në telefonat e bllokuar të shoferit të autobusit dhe drejtuesit të kompanisë së transporteve, policia po përpiqet të gjejë kontaktet e fundit, por edhe bisedat e mëparshme që mund të jenë bërë me palën pritëse në Itali.
