Qentë endacakë në rrugët e Elbasanit janë bërë një fenomen shqetësues për qytetarët dhe në disa raste ata janë kthyer në viktima të kafshimeve. Shumë prej qenve që lëvizin rrugëve janë qentë që braktisen nga pronarët e tyre. Të shqetësuar shprehen për këtë fakt qytetarët, të cilët kërkojnë sistemimin e tyre në qendra të posaçme.
Veterineri Bledian Oga në një intervistë për Fax News ugjeron qytetarëve të shmangin tufat me kafshët endacake në rrugë, ndërsa pohon se sistemimi i tyre kërkon një koordinim mes qytetarëve, shoqatave të kafshëve dhe institucioneve shtetërore.
‘Vërtetë është krijuar problem për një pjesë të madhe të qytetarëve, por që të sistemohet kjo duhet ndërveprim mes shumë institucioneve. Shumë prej qenve të rrugës janë braktisur nga vetë qytetarët, të cilët më pas edhe shumohen. Një zgjidhje do të ishte sterilizimi, nëse shihni tufa qensh, devijoni rrugën. Në momentin kur ata nuk ndihen të rrezikuar nuk sulmojnë”, shprehet veterineri.
Sipas studimeve, sëmundjet infektive të qenve endacake dhe të pavaksinuar që mund të transmetohen te njeriu janë shumë të rrezikshme, sepse shpesh mund të shkaktojnë edhe vdekjen.
