Partizani triumfoi 1-2 ndaj Erzenit në Durrës, në sfidën e javës së 31-të të elitës. Sinjalet e para të sfidës i dha Christan Mba. Sulmuesi kontrolloi në mënyrë fantastike një top, goditja e tij me të djathën u ndal nga Xhika.
Ekipi nga Shijaku provoi të zgjidhte takimin me gjuajtje nga distanca. Portieri Rexhepi iu përgjigj tentativës së Mehmetit, ndërsa po në të njëjtin aksion pati mundësi edhe Kadriu, pa rezultat.
Skuadra e Colellas nuk shfrytëzoi si duhet shpejtësinë e Mba nga krahët në minutën e 37-të, pasi as Rrapaj as Da Silva nuk mbërritën dot një top të dërguar prej tij.
Ekipi nga kryeqyteti zhbllokoi ndeshjen ccerek ore pas fillimit të pjesës së dytë. Nga Rrapaj te Telushi, ishte Da Silva që shënoi falë një skeme perfekte të Partizanit që gjeti të papërgatitur Erzenin.
Të kuqtë mbetën me një lojtar më pak në minutën e 83-të. Sota u ndëshkua me karton të kuq pas një ndërhyerje nda Nonatos. Asgjë për t’u shqetësuar te Partizani, për golin e qetësisë mendoi Hoti.
Në shtesë golin e nderit për të besuarit e Kapllanit e realizoi Atanaskoski me penallti.
Partizani ka grumbulluar 54 pikë dhe gjendet në vendin e dytë, 2 pikë më pak se Tirana që ende nuk ka luajtur sfidën e kësaj jave. Erzeni duket se do të luftojë deri në fund për mbijetesën, vendi i shtatë në tabelë dhe vetëm 38 pikë të grumbulluara.
