Kryetari demokrat Sali Berisha ka publikuar spotin e zgjedhjeve të 14 Majit, në qendër të të cilit është shpopullimi i Shqipërisë.
Në një letër të hapur drejtuar shqiptarëve, Berisha thekson se vota e 14 Majit është jetike për të shpëtuar Shqipërinë nga shpopullimi dhe Edi Rama. Berisha kujton se në 8 vite Shqipëria ka humbur 33% të popullsisë së saj, ndërsa shumica dërrmuese e atyre që kanë mbetur duan gjithashtu të largohen.
Berisha shprehet ndër të tjera se “e vërteta është se sa më shumë pushtet mbledh Edi Rama, aq më shumë ikin shqiptarët, sepse me këtë pushtet ai krijon kushte për dëbimin tuaj”.
Letra e hapur e Berishës për shqiptarët:
Kjo letër e hapur i drejtohet çdo shqiptari, demokrat, socialist, të papart. Unë Sali Berisha kam patur nderin t’ju shërbej si president, si kryeministër. Kam kaluar shumë fushata elektorale ndër vite. Por kurrë në asnjë fushatë, kurrë nuk është diskutuar ekzistenca e Shqipërisë si në këto zgjedhje.
Ne kemi humbur 33% të popullsisë në 8 vite dhe 83% e atyre që mbeten kërkojnë të largohen. Qytetet tona po shuhen, rinia po zhduket, kurrë nuk ka qenë Shqipëria më në rrezik se kurrë. E vërteta është se sa më shumë pushtet mbledh Edi Rama, aq më shumë ikin shqiptarët, sepse me këtë pushtet ai krijon kushte për dëbimin tuaj. Sot shqiptarët janë ende shumicë, por jo për shumë gjatë. 83% e tyre kërkojnë të ikin. Vota për Edi Ramën nxit shpopullimin. Kur të mbeten shqiptarët e fundit do të jetë shumë vonë për ta shpëtuar Shqipërinë.
Prandaj në këto zgjedhje bashkimi i çdo shqiptari është jetik. Socialist, demokrat, i paparti jeni njësoj të vjedhur. Të gjithë kemi humbur 1/3 e njerëzve të dashur.
Shqipëria e të gjithëve është në rrezik.
Le ta shpëtojmë atë!
Me 14 Maj nuk votojmë vetëm për bashkitë!
Votojmë kundër shpopullimit!
