Shpërndarja e fondeve para zgjedhjeve lokale nga institucionet shtetërore është kthyer tanimë në një çështje problematike sipas eksperteve, që synon përfitime elektorale.
Megjithatë, ministritë, institucionet në varësi dhe bashkitë vijojnë të avancojnë me këtë politikë.
Këtë të Enjte, ishte radha e ministres së Bujqësisë Frida Krfica të njoftonte shpërndarjen e milionave të radhës si subvencione për naftën në kuadër të programit IPARD – që synon mbështetje financiare për bujqësinë dhe zhvillimin rural kryesisht nga fondet e BE-së (75%) dhe qeverisë shqiptare (25%).
Nga Lushnja, ministrja tha se fermerët, fondet e skemës kombëtare, që shpeshherë janë atakuar se shkojnë për persona pranë pushtetit, do t’i marrin më shpejt se kurrë këtë vit – që përkon me zgjedhjet lokale.
Krfica u shpreh se të hënën e ardhshme, mbi 2000 fermerë duhet të bëhen gati të tërheqin naftën falas. Ajo bëri me dije se në fund të kësaj pranvere në kuadër të programit IPARD III, do të shpërndahen 146 milionë euro.
“Duke filluar nga java tjetër jemi gati të shpërndajmë subvencionet për ‘Skemën Kombëtare 2023’. Janë 2000 karta nafte të printuara për Skemën e Naftës, kështu do të vijojmë deri sa të shkojmë në fund”, bëri të ditur ministrja.
Më herët, qeveria miratoi një bonus për pensionistë dhe një projektligj për rritje pagash të administrues u miratua, të cilësuara gjegjësisht si nisma me synimin e përfitimeve elektorale, edhe pse nga qeveria janë mohuar këto akuza. Në media është raportuar po ashtu një shtim i fondeve të tenderuara nga bashkitë për publike, ndërsa në terren është konstatuar një vrull i të ashtuquajturit “asfalt elektoral”. Pak para zgjedhjeve lokale, nga bashki socialiste janë shpërndarë edhe fonde në kuadër të rindërtimit. Disa bashki kanë shpërndarë dhe ndihma ushqimore.
