Deputeti i Partisë Demokratike, Flamur Noka, është shprehur se qytetarët shqiptarë nuk janë bagëti që të mashtrohen me këngët tallava të qeverisë.
Gjatë një takimi në Valias të Kamzës, ku u prezantua kandidati i koalicionit “Bashkë Fitojmë” për këtë bashki, Arjan Hoxha, Noka i dërgoi edhe nje mesazh kandidatit të Enkelejd Alibeajt, Bilbil Bajraktarit, për të cilin tha se është i marrë peng nga mercenarët e kryeministrit Edi Rama dhe i kërkoi që të tërhiqet.
“Këtu kemi bërë një takim në 2021 kur unë isha kandidat për deputet. Sot ky shesh është 5 herë më i mbushur se atëherë. Sot shoh shpresë te fitorja më shumë se kurrë ndonjëherë. Sot jeni më të ndërgjegjësuar se kurrë se ndryshimi është domosdoshmëri. Se vota për kandidatin Arjan Hoxha është votë për fëmijët tuaj, votë për të ardhem. Sot jam besimplotë në fitoren e Arian Hoxhës.
Çdonjëri prej jush ka vuajtur më shumë se kushdo qeverisjen e Rilindjes. Të gjithë e dinë se ç’do të thotë të të qeverisë Kipja. Një njeri që veç parasë nuk njeh asgjë tjetër. Një njeri që ju fal bashkia. Ju keni sot një motiv për t’i dhënë vrull ndryshimit në Kamëz. Ju e ndieni se Sali Berisha është njeriu që ju mundësoi të jeni këta që jeni, këtu ku jeni dhe në rrugën e zhvillimit dhe integrimit.
Askush më shumë se ju nuk ka detyrë t’i kthejë votën Sali Berishës. Vota për koalicionin “Bashkë Fitojmë” është votë për Berishën. Kamza nuk e njëh tallavanë. Këtu në Valias ka halle e varfëri, këtu nuk ka bagëti që t’i mashtrosh me tallava. Ti mund t’i quash gomerë e çfarë të duash, por ne kemi qytetarë. Ne kemi Arjanin që ka luftuar kundër korrupsionit.
Kam një mesazh edhe për Bilbilin. Bilbil, unë e di që të kanë marrë peng. Mercenarët që të kanë marrë peng i shërbejnë Edi Ramës. Vota juaj duhet të jetë e gjitha votë për Arjan Hoxhën”, u shpreh Noka.
