Dinamo me në krye, Dritan Mehmetin, arriti të ngjitet në Superiore pas një sezoni të vështirë në Kategorinë e Parë.
Në lidhje me këtë sukses, në një intervistë për emisionin “Panorama Sport” në “Panorama TV”, trajneri Mehmeti pranoi se ishte e vështirë ndërkohë që u ndal edhe te ish-klubi i tij Partizani.
Ngjitja në Superiore- Ishte objektiv jo vetëm i imi sepse Dinamo është skuadër që duhet të jetë në Superiore. Është e dyta më e titulluar dhe legjendare kështu që e meritonin. Presidenti i ka marrë stemën skuadrës dhe po bën një investim madhështor, pasi Dinamo ka kompleksin e saj në Arbanë dhe po punojmë fort. Shpresojmë të jetë gati në shtator.
Marrja e ekipit në mes të kampionatit- Është e vështirë duke pasur parasysh që mora skuadrën me rezultate jo pozitive me 1 pikë në 5 ndeshje dhe 4 humbje. Në aspektin psikologjik kishte një ngërç dhe kishte probleme me 50% të skuadrës pasi kishin dëmtime dhe kur një skuadër vuan kaq shumë në një pikë deçizive të kampionatit, është situatë e vështirë dhe jam i lumtur që doli mes më të mirave dhe në pozicionin që i takon.
Sezoni i Superiores- Ky kampionat nuk ka pasur diferenca por ka një rënie dhe ka rivalitet. Rivaliteti vjen nga mos diferenca e skuadrave dhe pak më ndryshe ishin Tirana e Partizani. Do të jetë e fortë deri në fund e të fitojë më e mira. Nuk jam parashikues por duke njohur Partiznanin dhe duke ditur investimet, do isha më lart se Tirana.
Gabimet e Partizanit? “Ka pasur oshilacione sepse ka larguar shumë lojtarë dhe mendoj se është problem. Duhej të kishte më shumë ekuilibër sepse një skuadër që kërkon titullin, nuk duhet të pësojë kaq gola. Uroj ta fitojë Partizani titullin këtë sezon”, u shpreh Mehmeti.
