Vetëm 19 ditë na ndajnë nga 14 Maji, dita kur shqiptarët do t’i drejtohen kutive të votimit për të zgjedhur drejtuesit lokale për 61 bashki të vendit.
Fushata elektorale ndonëse jo aq e bujshme dhe me shpenzime për evente sa të mëparshmet, ka hyrë në fazën e nxehtë të saj me shtabet e të gjithë kandidatëve që janë angazhuar maksimalisht për të bindur qytetarët që të votojnë alternativën e tyre.
Por ndryshe nga opozita që po zhvillon takime derë më derë, e rrugicë më rrugicë për të njohur nga afër hallet dhe problemet e përditshme të qytetarëve, Partia Socialiste në pushtet ka zgjedhur të maksimizojë votën duke shkelur me të dyja këmbët Kodin Zgjedhor.
E gjithë administrata shtetërore dhe drejtuesit lokalë të institucioneve në varësi të qeverisë janë vënë në funksion të fushatës eklektorale për kandidatët e Ramës në 61 bashkitë e vendit.
Sakaq nuk ndalet lëvrimi i fondeve për asfalt elektoral, ndërkohë që kryeministri në Tiranë hapi “thesin” e premtimeve për rritje pagash dhe lëvroi fondin për “lëmoshën” 5 mijë lekë të reja për pensionistët, në këmbim të votës së tyre.
Shembulli më i qartë i vendosjes në funksion të makinerisë elektorale të PS për punonjësit e administratës vjen nga Vlora, aty ku Blendi Klosi i bën presion titullarëve të drejtorive kryesore që të angazhohen në “vjeljen” e votave.
Me një mesazh në Whatsapp drejtuesi politik i qarkut të Vlorës i kërcënon drejtorët e bashkisë dhe institucioneve shtetërore duke thënë se “nëse nuk paraqiten në takim me detyrat e kryera (listat emërore), do quhet sikur nuk e kanë kryer punën”.
Në orar zyrtar të punës, Blendi Klosi detyron drejtorët të shkojnë në mbledhje e shtabit të fushatës së socialistëve. Një nga shembujt është drejtoresha e spitalit të Vlorës Bruna Mersini, e cila duhet të jetë në spital pranë pacientëve, por Klosi ashtu si me të tjetrët i jep urdhër të shkojë në mbledhjen e partisë.
“Jo vetëm skanim por edhe censusin për çdo listë zgjedhësish të qendrës së votimit. Kush nuk paraqitet do konsiderohet se nuk e ka kryer detyrën dhe misionin për të cilin kemi 4 muaj që komunikojmë, takohemi dhe premtojmë që e kemi realizuar!”, është mesazhi që Klosi shkruan në grupin në Whatsapp të koordinimit të fushatës.
LISTA E DREJTORËVE TË BASHKISË DHE INSTITUSIONEVE TË ANGAZHUAR NË MBLEDHJEN E VOTAVE:
Ëngjëll Avdulaj – Drejtor i burgut
Irena Stasa – Drejtoreshë e Shërbimit Social
Daut Zeraj – Shefi Financës së Bashkisë Vlorë
Albi Gjenerali – Drejtor i OSHEE-së
Anila Hitaj – Drejtoreshë e Shtëpisë së Foshnjës
Anjëza Shiko- Drejtoreshë e Tatimeve Bashki
Ermal Sinaj – Drejtor i Agjencisë së Bregdetit
IRrena Toshkallari – Drejtoreshë e Arsimit
Olta Ganaj – Drejtoreshë e Spitalit Psikiatrik
Vilma Bello – Zv/ministre e Turizmit
Ani Binaj – Drejtor i AKU
Besnik Këndezi – Drejtor i TEC-it
Arnold Rrokaj – Drejtor i IMT-së në Bashki
Saniela Xhaferri – Drejtoreshë e Zyrës së Punës
Flamur Mamaj – Prefekt i Vlorës
Aulona Veizi – Nënkryetare e Bashkisë
Shkëlqim Rama – Drejtor i Postës
Brunilda Saliaj – Drejtoreshë e Shërbimeve Shoqërore
Edmond Leka – Drejtor i Shërbimeve Publike në bashki
Sokol Kananaj – Drejtor i Tatimeve
Elona Hodaj – Drejtoreshë e Ujësjellësit
