Kolegji Zgjedhor rrëzoi këtë të Premte kërkesën e “Bashkë Fitojmë” për të vendosur emrin e Sali Berishës krah emrit të koalicionit në fletën e votimit, për lokalet e 14 Majit.
Të njëjtin vendim dha edhe KAS, që u ankimua më pas nga koalicioni opozitar. Pas shqyrtimit të ankimin këtë të Premte, kolegji vendosi rrëzimin e tij.
Kështu, krah emrit të koalicionit në fletën e votimit do të jetë ai i Ilir Metës dhe jo i Berishës.
Më herët, Kolegji Zgjedhor rrëzoi kërkesën e koalicionit “Bashkë Fitojmë”, që kishte kërkuar që logot e partive të mos vihen krahas fletës së votimit për kryetarë bashkie.
Vendimin e kolegjit që s’pranoi të vendosë emrin e tij në fletën e votimit, Berisha e quajti të ndikuar nga kryeministri Edi Rama. Komentin e bëri në emisionin “Zonë e Lirë” mbrëmjen e sotme.
“Je totalisht i rrethuar”, iu drejtua Berishës drejtuesi i emisionit Arjan Çani.
“Dhe do fitoj”, u përgjigj Berisha.
“Këto janë dëshmi së pari për një shtetit që s’respekton asnjë lloj parimi që njëlloj si në diktaturë mendon se mund të caktojnë kryetarin e koalicionit që në çdo vend të lirë të botës është emërtesë e një marrëveshje ndërpartiake, pavarësisht përkatësia ose jo në ato forcë politike. Kurse këtu, këta mendojnë se e bëjnë me diktim. Në këtë kontekst kjo tregon një tmerr të papërshkrueshëm. Rama përpiqet me çdo gjë të mund të kufizojë rolin e Sali Berishës, pasi e di që është viktimë e vetes, për dhjetëra e dhjetëra afera ndër më kriminale. E di që e prek ekstradimi i sigurt nga Sali Berisha, minimumi”, shtoi kreu i PD-së.
