Partizani fitoi sot në mbrëmje finalen e tretë play off në volejboll për meshkuj, duke rihapur garën për titullin kampion.
Të “kuqtë” mposhtën 3-0 Tiranën në derbi, ndeshje e luajtur në “Asllan Rusi”.
Pas këtij takimi, bardheblutë udhëheqin 2-1 me ndeshje, pasi kanë fituar dy sfidat e mëparshme.
Tirana synonte fitoren edhe sot për të festuar titullin e dytë radhazi, por Partizani prishi festën e rivakëve. Një ndeshje që foli për Partizanin, më superior në fushë, duke mos përsëritur gabimet e ndeshjeve të mëparshme.
Të trija setet u dominuan nga të kuqtë, që i fituan ato me shifrat 25-20, 25-22, 25-20.
Bardheblutë nuk dhanë atë që pritej në fushë, duke qenë më të lodhur e gabuan në gjuajtje e pritjen e topit të parë. Partizani luajti më i vendosur për fitore, duke ditur se ishte shansi i fundit.
Për pasojë, të kuqtë ushtruan më shumë presion dhe korrën një fitore që i mban ende në lojë për titullin.
Finalet play off-meshkuj
Nd.1, Partizani – Tirana, 1-3
Nd.2, Tirana – Partizani, 3-2
Nd.3, Partizani – Tirana, 3-0
Nd,4 Tirana – Partizani
