Emri i moderatorit dhe këngëtarit të njohur shqiptar, Ardit Gjebrea, është përdorur nga një person tjetër, Përparim H. për përfitime personale nëpërmjet mashtrimit. Ky person ka vendosur foton e Gjebreas në një aplikacion komunikimi dhe i ka shkruar mikut të moderatorit duke i kërkuar 2 mijë euro pasi i nevojiteshin për nevoja shëndetësore.
Ai është treguar i gatshëm dhe ka nisur djalin e tij të dërgojë shumën e kërkuar. Personi që ka mashtruar mikun e moderatorit, nuk ka shkuar ti marrë vetë shumën e parave, por ka nisur një taksist ti marrë dhe më pas t’ia sillte.
E gjithë kjo, ka ngritur dyshime tek miku i Ardit Gjebreas dhe ai ka telefonuar këtë të fundit për ta pyetur se kë kishte në spital. Moderatori i ka treguar se nuk ka asnjë person në spital dhe këtu është zbuluar se ai ka rënë pre e një mashtrimi. Ata kanë denoncuar rastin në fjalë në polici dhe këta të fundit e kanë arrestuar atë.
Gjykata e Shkallës së Parë Tiranë, më 1 prill 2022, i ka caktuar Përparim H. masën e sigurimit “arrest me burg”. Gjykata e Apelit, më 3 tetor 2022, ka zbutur masën e sigurimit dhe ka vendosur detyrim paraqitjeje. Gkykata e Lartë, më 16 shkurt 2023, ka rrëzuar vendimin e Gjykatës së Apelit dhe ka rikthyer çështjen për rishqyrtim në Apel.
- Ngjarja e plotë
Në vendimin e Gjyaktës së Lartë që disponon Boldnews.al, Besnik S. ka kallëzuar se më datën 23.10.2020, rreth orës 12.50, ndërsa ka qënë me disa miq i ka ardhur një mesazh nga numri telefonik 0677155***, me foton e shtetasit Ardit Gjebrea. Pasi janë përshëndetur i ka kërkuar t’i jap hua një shumë prej 2.000 Euro për nevoja të ngutshme shëndetësore. Duke besuar se ishte vërtetë Arditi, me të cilin ka marrëdhënie shoqërore të ngushta, me anën e djalit të tij Florit, i ka dërguar shumën e mësipërme me anë të një personi të dërguar prej tij. Në orën 14:27 e ka telefonuar djali dhe i ka thënë se ia kishte dhënë paratë të dërguarit të Arditit.
Pas disa orësh, duke qenë dyshues, Besnik S. ka telefonuar Ardit Gjebrea. dhe e ka pyetur se cilin kishte në spital. Arditi është befasuar, duke i thënë se nuk kishte njeri në spital dhe se kishte rënë pre e një mashtrimi. Në këto momente i ka thënë të shkojë të denoncojë pasi është një mashtrim dhe kështu vepruan.
Ilir V., në deklarimet e tij midis të tjerash thekson se, punon si taksist me mjetin e tij, me targa AF *** T. Më datë 23.10.2020, rreth orës 14.05, ndërsa po qarkullonte në rrugën midis Selisë së Partisë Demokratike dhe B.K.T, i ka dal përpara në rrugë një person, rreth 35 vjeç, i cili i ka bërë shenjë ndalimi. Ka ndaluar mjetin dhe personi i ka kërkuar që të shkoj deri tek një X hotel dhe të marrë një porosi dhe më pas t’ja sillte këtij personi, i cili do ta priste aty. Ka bërë pazarin me këtë person dhe i ka dhënë numrin e tij të telefonit. Për këtë shërbim ka thënë se do paguhej në shumën e 700 lekëve. Në të njëjtën kohë ky person i ka dhënë numrin e tij të telefonit (0673426***) personit tek, i cili do të merrte porosinë dhe me numrin e shtetasit Ilir V. ka folur me personin që e priste tek hoteli. Pas kësaj i ka thënë që të shkoj e të marrë porosinë.
Taksisti Ilir V. ka shkuar tek hoteli pa e ditur se çfarë porosie do të merrte. Ka telefonuar numrin që i dha personi i mësipërm, me personin nga i cili do të merrte porosinë. Ky person kishte numrin e telefonit 0689045*** dhe u prezantua me emrin Flori. Pas disa minutash ka ardhur një djalë i ri, i gjatë, i cili i ka dhënë një zarf me 2.000 Euro. Djali i telefonoi duke i thënë se më kishte dhënë lekët dhe do ti sillte taksisti. Ilir V. shpjegon se i ka telefonuar në numrin 0677155*** dhe i ka dërguar shumën e mësipërme tek vendi ku kishim lënë për tu takuar. Ai mori lekët dhe u largua pa i numëruar.
Pas disa ditësh, taksisti është thirrur në ambjentet e policisë dhe aty nëpërmjet paraqitjes për njohje me anë të fotografisë, ka njohur personin, të cilit i ka dhënë shumën prej 2.000 Euro. Ky person quhej Përparim H.
/A.L.-Boldnews.al/
