Pavarësisht shqetësimeve për shkelje të Kodit Zgjedhor, qeveria e drejtuar nga kryeministri Edi Rama vijon me avancimin e nismës së rritjes së pagave të administratës.
Në një njoftim për mediat, ministrja e Financave Delina Ibrahimaj bëri me dije këtë të Enjte se projektligji për rritjen e pagave ka marrë sot ‘dritën jeshile’ në Këshillin e Ministrave – vendim i cili i hap rrugë rritjes së pagave të disa profesioneve në vend, si punonjësit e IT, mjekët, infermierët, policët, mësuesit etj.
E pyetur se si do të gjenden fondet për këtë rritje pagash, Ibrahimaj tha se janë parashikuar të mblidhen nga rritja e të ardhurave dhe rialokimet e brendshme.
Rritja e pagave është parë me shqetësim në disa aspekte. E para lidhet me kohën e realizimin, pak para zgjedhjeve lokale të 14 Majit. Për opozitën dhe ekspertët kjo është në shkelje të kodit Zgjedhor. Kryeministri Edi Rama ndërkohë, pretendon se neni në Kodin Zgjedhor që ndalon rritjen e pagave para zgjedhjeve lidhet me zgjedhjet parlamentare dhe jo ato lokale. Deri më tani, nga ana e KQZ-së nuk ka konstatim se vendimet e qeverisë janë në shkelje të kodit.
Shqetësimi tjetër lidhet me aspektin ekonomik të çështjes, me ekspertë të fushës që paralajmërojnë se mund të ketë një efekt bumerang. Sipas tyre, nisma e rritjes së pagave është e pastudiuar dhe në kundërshtim me politikën monetare të Bankës Qendrore që ka rritur normën bazë të interesit, si një instrument për të ndikuar në uljen e inflacionit në vend. Po ashtu, vlerësohet se mund të ndikojë në shtimin e borxhit publik. Pas rritjes së pagës minimale, rritja e pagave të administratës pritet të reflektohet edhe në biznesin privat dhe sipas ekspertëve, nisma e pakonsultuar me biznesin, mund ti vërë ata në pozita të vështira.
