Shefja e Misionit të Vëzhguesve të ODHIR, Audrey Glover ka nisur sot takimet e saj me aktorë të klasës politike, në vazhdën e misionit për të monitoruar procesin zgjedhor të 14 majit në vendin tonë.
Vizita e parë e Glover është në selinë e Partisë së Lirisë, aty ku është pritur nga kreu i saj Ilir Meta.
Glover dhe Meta pritet të diskutojnë së bashku lidhur me zhvillimin e fushatës zgjedhore dhe përfaqësuesja e ODHIR do të japë mesazhet e saj të qarta për mbarëvajtjen e procesit.
Më herët ajo ka deklaruar se fokusi i ndërkombëtareve do të jetë edhe financimi gjatë fushatës si dhe nëse media do të pengohet në ndonjë farë formë gjatë raportimit të procesit të zgjedhjeve lokale.
Ndërkohë, në një lëvizje befasuese, ndryshe nga të gjithë përfaqësuesit e tjerë ndërkombëtarë që kanë ardhur në Tiranë së fundmi, Glover pritet që në orën 13:00 t’i drejtohet selisë së Partisë Demokratike, ku do të takojë liderin e opozitës Sali Berisha.
Glover e paralajmëroi një zhvillim të tillë, teksa më 7 prill u pyet nga gazetarët nëse do të ketë një takim me ish-kryeministrin Berisha.
“Do isha e lumtur të takohesha me këdo që është i përfshirë në këtë proces zgjedhor”, u përgjigj Glover.
Përgjigjia e saj u mirëprit edhe nga kryedemokrati Berisha, i cili tha se raporti i saj i 4 viteve më parë për zgjedhjet e zhvilluara në vend ishte më profesionali i shkruar ndonjëherë. Për të ky raport u injorua nga qeveria, opozita dhe eksponentë të komunitetit ndërkombëtar.
“Nuk ka as dashuri e as armiqësi të përjetshme. Audrey Glover në zgjedhjet e fundit ka bërë një raport shumë profesional dhe unë e kam vlerësuar raportin e saj. Nëqoftëse raporti i zonjës Glover do të merrej me seriozitetin më të madh nga qeveria dhe komuniteti ndërkombëtar, Shqipëria nuk do të ishte kurrë në këtë gjendje, por raporti i saj u injorua nga opozita, e cila duhet ta kishte bazë kryesore për transformim në kuadrin ligjor. Ai raport u shpërfill në mënyrë të tmerrshme nga qeveria dhe eksponentë të caktuar të komunitetit ndërkombëtar. Por është raporti më profesional që mund të jetë shkruar ndonjëherë për procesin zgjedhor”, tha Berisha në një dalje për mediat.
Sa i përket Audrey Glover, ajo është një veterane e proceseve zgjedhore në Shqipëri. Për herë të parë ajo ka drejtuar misionin e vëzhgimit në zgjedhjet politike të vitit 1996 dhe u rikthye në vendin tonë në zgjedhjet e vitit 2009 e më pas në ato të viteve 2015, 2019 dhe tashmë ka marrë përsipër edhe garën e 14 Majit.
