Partizani u ndal sërish këtë javë, teksa në Laç u mposht nga kurbinasit.
Dy javë rresht për demat që nuk e njohin fitoren, ndërsa humbasin terren në luftën për titull. -5 pikë nga Tirana kryesuese kur kanë mbetur edhe 7 ndeshje deri në fund për të vendosur se cila nga ekipet e kryeqytetit do të mund të ngrejë trofeun e kampionatit.
Renato Kalari, i cili ëhstë trajner i Partizanit U-19, i ftuar në “Sport News” shprehi me bindje se të kuqtë do të fitojnë derbin ndaj bardhebluve dhe do të koleksionojnë kështu edhe titullin kampion.
Ndër të tjera ish-lojtari i demave ka theksuar se pavarësisht diferencës me 5 pikë, përsëri Tirana nuk di të mbajë vendin e parë.
“Shpresoj që derbi të bëjë kthesën. Ka akoma shumë ndeshje. Diferenca e pikëve i jep avantazhin Tiranës, por mund të ketë befasi. Jam i bindur se do të ketë befasi. Janë shumë skuadra në lojë për objektiva të ndryshme. Diferenca do ngushtohet mes skuadrave deri në fund. Për Partizanin gjërat mund të jenë më të thjeshta nëse ia del në derbi.
Tirana ka qenë pragmatiste në ndeshjet e fundit. Si Kukësi edhe Egnatia i vuri në vështirësi bardheblutë, por këta të fundit ia dolën. Abazaj i ka treguar vlerat e veta. Secili lojtar ka rëndësinë e vet. Pavarësisht se Abazaj shënoi dy gola, të gjithë futbollistët treguan se dëshironin ta fitonin ndeshjen me Egnatian.
Ka ikur koha kur ndikon fanella. Këtë vit Tirana ende nuk e ka fituar kampionatin. Jam i bindur se Partizani do afrohet dhe jam i bindur se do të fitojë kampionatin. Situata mund të ndryshojë nga java në javë. Duke marrë parasysh këto, statistikat nuk ndikojnë.
Partizani e ka më të fortë organikën. Tirana ka shumë mungesë, ndërsa tek të kuqtë nuk dihet kush futet dhe kush del. Ky është avantazhi i madh që ka skuadra e Colellas. Tirana ka më shumë pikë, por shpeshherë bardheblutë kanë treguar se nuk e mbajnë si duhet vendin e parë”, përfundoi Kalari.
