Kreu i Partise Demorkatike, Sali Berisha u shpreh se Shqipëria do të duhet të paguajë në total në Gjykatat Ndërkombëtare rreth 1.6 miliardë euro dëmshpërblim mbi paditë e ngritura nga biznesmenë të ndryshëm.
Komentet Berisha i bëri gjatë një takimi në Gramsh, ku prezantoi kandidatin e koalicionit “Bashkë Fitojmë” për këtë Bashki, Hasim Çekrezi.
Berisha tha se veç çështjes Becchetti që i kushtoi vendit tonë 110 milionë euro, Shqipëria ka edhe 12 çështje të tjera në Gjykatën e Arbitrazhit Ndërkombëtar, 5 çështje në Gjykatën e Parisit dhe 4 çështje në Gjykatën e Zvicrës.
“Të shtunën që kaloi ne hapëm fushatën elektorale, por madhështia e asaj fushate, ishin kandidatët tanë, të cilët shkëlqenin. Ata duket sikur e kanë të shkruar në ballë “kandidatët e lirisë, të dinjitetit njerëzor…” Ju garantoj se Hasimi do të bëjë gjithçka, do të përdorë me eficencën më të madhe fondet dhe paratë tuaja. Do të bëjë gjithçka t’u japë përgjigjen më të mirë problematikave të shumta me të cilat përballet Gramshi. Unë i shoh problematikat këtu dhe ndiej një dhimbje të madhe. Këtu ndodhën ndryshime epokale, u bëtë me liqej, u ndërtua kaskada, u nis një transformim i infrastrukturës.
Nuk ka bekim më të madh nga zoti e natyra sesa Gramshi për pasuritë ujore. Gramshit nuk i afrohet asnjë rreth tjetër. Por sa përfiton? Unë dëgjova që as fshatrat buzë liqenit nuk sigurojnë vaditjen. A është një bekim, apo një mallkim për qytetarin. Çfarë përfitoi Gramshi nga ndërtimi i Hidrocentralit? Asnjë qindarkë. Në vend t’ju linte juve rentën për minierat, për të gjitha.
Hoqi rentën për të mbushur xhepat e tij dhe të oligarkëve. Një fshat që nuk ka rrugë, po të mos kishte edhe elektricitet, mund ta çosh 300 vite pas. Edhe 300-500 vite më parë, rrugë ka pasur, por kanë qenë rrugë qerresh. Rrugët sot janë të nivelit mesjetar, baltë, baltë dhe vetëm baltë. Gjatë këtyre viteve kanë bërë zero. Hasimi ka për rival një ish-deputet. A e dëgjuat ju njëherë këtë Ajazin, të flaës njëherë për Gramshin në Parlament?
Këto ditë e keni marrë vesh kemi humbur 110 milionë euro në “Arbitrazh”. Sepse Rama është njeri që nuk kontrollon dot urrejtjen. Mori përzuri investitorin Italian, i vuri celësat u mburr se e përzuri për ti mbyllur Agon Channel dhe i këputi “Arbitrazhi” i Bankës Botërore një gjobë 110 milionë euro, përveç interesave.
Jemi vetëm në këtë gjykatë dhe në 12 çështje të tjera, në Gjykatën e Parisit për 5 çështje të tjera dhe në Gjykatën e Zvicrës për 4 çështje të tjera.
Ju garantoj se 1.6 miliardë euro do të jetë gjoba jonë. Këto duhet t’i paguani të gjitha ju. Përpara me Ramën do të thotë përpara drejt braktisjes, përpara drejt varfërimit. Ju duhet të uleni me çdo socialist, me çdo qytetarë të Gramshit dhe ti paraqisni këto fakte. Si mund të pranohet një kryebashkiak që nuk del ballë për ballë”, u shpreh Berisha.
