“Autobusi falas” nuk është i vetmi premtim real që mund të realizohet duke marrë parasysh buxhetin prej 240 milionë eurosh në vit që Bashkia e Tiranës menaxhon, sipas kandidatit të koalicionit opozitar për zgjedhjet e 14 majit, Belind Këlliçi.
Në një shpjegim të thjeshtë që i bëri sot pesë angazhimeve të tij kryesore të fushatës për të fituar bashkinë e kryeqytetit, Këlliçi në “Kafe Sheqto” u ndal te projekti për nënkalimin te sheshi “Skënderbej” si vepra infrastrukturore që do t’i rikthente frymëmarrjen Tiranës.
Duke e vendosur këtë projekt në qendër të fushatës së tij elektorale, Këlliçi sqaroi se një nënkalim nëntokësor me dy sense të lëvizjes do të mundësonte lehtësimin e trafikut në qendër të Tiranës, në “Unazën e Vogël” që është shndërruar në një nga nyjet më problematike për qarkullimin e mjeteve.
Me hartën e projektit në dorë, Këlliçi shpjegoi se si do bëhet lëvizja e makinave në drejtimin Veri–Jug e anasjelltas, duke lidhur bulevardin “Dëshmorët e Kombit” me bulevardin “Zogu 1”, me vetëm një ndërhyrje.
Kandidati i “Bashkë Fitojmë” u shpreh se projekti është bërë nga specialistë të shquar të fushës dhe do t’i kushtonte buxhetit të Bashkisë rreth 4.5 mln euro, por efikasiteti do të ishte i lartë pasi përllogaritet që me këtë nënkalim të kursehet gjysma e kohës dhe e stresit që qytetarët e Tiranës kalojnë çdo ditë në trafikun torturues të qendrës.
Gjatë bisedës në studio, Kelliçi u është përgjigjur dhe telefonatave të shikuesve, ku ka folur për paketën e plotë që ai ka për zbutjen e kostos së jetesës, me transportin publik falas, uljen e taksave dhe tarifave, dhe mbështetjen për familjet.
