Festa e Pashkëve ortodokse në Greqi është përgjakur, teksa pas meshës së ringjalljes së Krishtit dhe shpërndarjes së flakës së shenjtë, spektakli i fishekzjarreve që është traditë e përvitshme ka lënë pas një numër të konsiderueshëm të plagosurish në disa qytete dhe ishuj.
Sipas mediave helene, tre fëmijë nga Rodosi, Agistri dhe Symi janë plagosur rëndë me amputim gishtash dhe djegie nga fishekzjarret që u shpërthyen pas thirrjes “Krishti u ringjall” natën e së shtunës.
Sipas informacioneve të protothema.gr një 14-vjeçar nga Agistri ka pësuar djegie të shumta dhe këputje të gishtave të dorës së majtë nga një fishekzjarr. Djali u dërgua në spitalin e fëmijëve “Agia Sofia” ku iu nënshtrua një operacioni dhe tashmë ndodhet i shtruar në spital.
Në të njëjtin spital është transportuar me helikopter një djalë 13-vjeçar nga Symi, i cili ka pësuar amputim të pjesshëm të gishtave të dorës së djathtë dhe traumë në fytyrë nga një fishekzjarr dhe pritet t’i nënshtrohet një operacioni.
Në Rodos, një vajzë 7-vjeçare u dërgua me djegie në spitalin e ishullit. Ajo u lëndua pasi persona të panjohur lëshuan fishekzjarre duke shkaktuar një zjarr masiv në fshatin Malona.
Sipas informacioneve të rodiaki.gr, 7-vjeçarja ka qenë në oborrin e kishës kur persona të panjohur kanë nisur të hedhin fishekzjarre. Siç shihet në një video të regjistruar nga një dëshmitar okular, zjarri nga xixëllonjat ka kaluar mbi disa persona që ndodheshin pranë kishës në zonë.
“Sot një fëmijë 7 vjeç nuk do të marrë qiriun për të shkuar në ringjallje…Sot ky fëmijë nuk do të çajë vezën e kuqe që mezi priste t’a bënte…Sot ky fëmijë vuan në spital me djegie. … Sot dhe për disa vite në vazhdim, prindërit e këtij fëmije do të shqetësohen se mund të mbeten shenja në fytyrën e saj të vogël…Pse nuk e menduat veprimin tuaj dje?”, ka shkruar presidenti i komunitetit Manolas, Nektarios Moustakellis në një postim në rrjetet sociale për ngjarjen.
Shpërthimi i fuqishëm ka shkaktuar zjarr në pjesën e përparme të kishës, ndërsa janë thyer xhamat e dyerve dhe dritareve .
Ndërkohë, katër të plagosur janë shënuar edhe në Leonidio të Arkadisë.
Sipas ERT, ngjarja ka ndodhur në famullinë e Agios Vasilios Leonidio, ku katër persona kanë mbetur të plagosur në tentativën e tyre për të ndezur fishekzjarret.
Katër të rinjtë janë dërguar me ambulancë në Qendrën Shëndetësore Leonidio për ndihmën e parë, ndërsa dy prej tyre janë transportuar më pas në Tripoli pasi kanë marrë djegie në duar dhe në gjoks.
