Një javë pasi u bë i njohur në rrjet pasi “xhemati” i dhuroi një makinë “Mercedes Benz” luksoz pas daljes në pension, hoxha nga Prizreni Mazllam Mazllami, ka “pushtuar” sërish rrjetin me një veprim të pahijshëm.
Në një video që është bërë virale, Mazllami shihet duke përdhorus flamurin kombëtar shqiptar, teksa e quan arnë edhe leckë. Më tej ai dëgjohet të thotë se shqiptarët janë myslimanë ndaj nuk duhet të adhurojnë shqiponja.
Hoxha gjithashtu iu bën thirrje myslimanëve që të mos e kondiderojnë të rëndësishëm flamurin për të cilin shumë shqiptarë luftuan, u burgosën, u torturuan e u vranë.
“Kjo është arrnë, leckë, bezë. Këta kur e kemi qitë për 28 Nëntorin… Edhe mos me qitë hiç, kurrgja s’bahet kijameti. Populli ynë, populli shqiptar janë muslimanë 80%, e njohin ma paganizmin çka është. Na nuk adhurojmë shqiponja, nuk adhurojmë zogj”, thotë hoxhë Mazllami.
Për të, të padenjë janë edhe dëshmorët e kombit, përveç atyre që “janë dëshmorë të Allahut”.
“Shehid nuk bidet qysh po thotë dikushi – plot shehidë jemi ba, është mbushë Kosova dëshmorë… E lus Allahun që këta që na kanë ra dëshmorë, ishalla janë dëshmorë të Allahut. Se na që i shkruajmë dëshmorë e ju vnojmë pllakata mas 50 vjete krejt jau thejmë”, shton më tej ai.
“Edhe pse është himni të gjithë të bashkuar rreth flamurit, edhe me u bashku krejt rreth flamurit, me qet flamur në xhenet a hyjmë?”, thotë më tej Mazllam Mazllami.
Të hënën, pasi mori dhuratë veturën luksoze të tipit “Mercedes Benz”, ishte gazetari Valon Syla që kritikoi hoxhën me disa reagime sarkastike, duke shkruar se si prijësit fetarë të myslimanëve në vend po duken si “njerëz të shoëbizit”.
Kjo bëri që gazetari të sulmohej brutalisht nga tre persona, të cilët kanë pranuar se kritikat e Sylës ndaj hoxhë Mazllamit ishin motivi i tyre, duke mos shprehur pendesë për sulmin.
Ndërkohë, sa i përket Mazllamit, hoxha nga Prizreni para disa vitesh u akuzua për thirrje për rezistencë dhe për nxitje për kryerjen e veprave terroriste. Më saktësisht, ai dhe disa imamë të tjerë dyshohej se i kishin nxitur disa nga ‘xhemati’ i tyre të shkonin në Siri për të luftuar përkrah shtetit Islamik ISIS.
