Kryetari i Aleancës për Ardhmërinë e Kosovës, Ramush Haradinaj këmbëngul se zgjedhjet në veri, që pritet të mbahen më 23 prill, duhet të shtyhen. Sipas tij, ky skenar është në dobi të Kosovës, në të kundërtën mbajtja e tyre, është humbje për vendin.
Haradinaj thekson se me mbajtjen eventuale rrezikohen edhe më tej policët që operojnë në veri. Ish-kryeministri është shprehur për KosovaPress, se duhet të tregohet mençuri dhe që proceset që i bëjnë dëm Kosovës të ndalen në kohë.
“Duhet bërë kujdes, opsioni i ndaljes së këtij procesi është i mençur, është në dobi të Kosovës dhe e shpëton edhe fytyrën tonë si shtet”, ka thënë Ramussh Haradinaj.
Ai thotë se fakti se zgjedhjet mbahen qendra jo të rregullta e të zakonshme votimi, e vështirëson pjesëmarrjen e qytetarëve për të votuar, ndërsa shton se në këtë formë rrezikohet edhe siguria e pjesëtarëve të Policisë së Kosovës.
“Duhet të kthehet një diskutim serioz me aleatët tonë, pra me Amerikën, aleatet tjerë të QUINT-it dhe të gjendet formula që të gjithë të bien dakord për mbajtjen e zgjedhjeve, përfshirë edhe të gjitha partitë politike në veri”, vijon kryetari i AAK.
