Deputeti i PD-së, Edmond Spaho duke folur për situatën pak para çeljes zyrtare të fushatës zgjedhore, u shpreh se ka një entuziazëm të jashtëzakonshëm nga mbështetësit e opozitës.
Ndërsa sa i përket shpërndarajes së fondit nga KQZ, ku PD e Berishës nuk mori asnjë lekë, Spaho tha se po kërkohet të bëhet shantazh me buxhetin e shtetit për të vjedhur votën.
“Kudo që të shkosh kandidatët tanë ndiqen me interes, kërkojnë të mbështeten për nevojat që kanë komunitetet. Të shtunën hapim zyrtarisht fushatën në stadiumin Air Albanai dhe e gjithë kjo kohë që ka mbetur do të shërbejë për të shpërndarë mesazhin tek qytetarët që bashkë fitojmë dhe votën duhet ta hedhim për të ardhmen tonë dhe zhvillimin e vendit. Ne në të gjitha bashkitë e qarkut Korçë hyjmë për të fituar dhe mbështetja për kandidatët tanë është e plotë. Në zgjedhjet e përgjithshme në 2021 rezultati ka qenë shumë i ngushtë dhe në nivel qarku dhe në bashki. Mund të them se bashkia e Korçës është ndarë me 110 vota. Pra ne po punojmë dhe jemi të bindur se në Korçë dhe jo vetëm do të fitojmë”, tha Spaho per MCN.
Sa i përket fondit për fushatën, Spaho tha se sot në kuvend do diskutohet një projektvendim për ndarjen e tyre, ku ata kanë ngritur shqetësimin se paratë jepen për ata që marrin pjesë në zgjedhje dhe jo ata që nuk marrin pjesë.
“Si gjithmonë në mënyrë abuzive paratë po u jepen atyre që nuk marrin pjesë dhe kjo ëhstë një mënyrë për ti bërë shantazh PD së Berishës për të vjedhur votën. Me paratë e buxhetit të shtetit po përpiqet të blejë atë pjesë të opozitës që u bien muzikës sipas veshëve të qeverisë, po paratë duhet të shkojnë për atë qëllim që janë planifikuar në buxhetin e shtetit”, vijoi ai.
Ndërsa pyetjes së si i shihni largimet e njëpasnjëshme të kandidatëve nga grupi i Alibeajt, Spaho tha se këto dorëheqje po tregojnë përgjegjshmëri personale.
“Do kandidosh kur ke mbështetje. Nëse e gjithë struktura e PD mbështesin kandidatët e foltores çfarë rëndësie ka kandidimi, pra një pjesë e tyre arritën të kuptojnë situatën në të cilën ndodhemi dhe morën vendimin e duhur. Mendoj se janë dorëheqje të personave të caktuar që po tregojnë përgjegjshmëri. Nuk di të them nëse kjo mund stë përkthehet në një bashkim, është mirë të presim të përfundojmë procesin zgjedhor dhe pastaj të shohim hapat që do marrim bazuar dhe në ecurinë e zgjedhjeve të 14 majit. Berisha ka mbështetjen e plotë të PD, e kanë treguar një sërë ngjarjesh të gjithë e dinë se në partinë që opozita përfaqësohet nga grupi Rithemelit me në krye është Berisha”,tha Spaho.
Fushatën e PS për mbjelljen e pemëve Spaho e ka cilësuar qesharake kur sipas tij ata e kanë mbushur Tiranën me kulla.
“Këto janë lëvizje bolgjevike për të treguar shqetësimin e madh. Këta për të mbjellë pemë kur e kanë mbushur Tiranën me kulla është qesharake. Kryeministrit meqë sondazhet si dalin mirë merr iniciativa të tilla si ajo e rritjes së pagave dhe se sa serioz është në këtë çështje do e shohim në të ardhmen, por dhe nëse ndodh kjo do rrisë borxhin, do rëndojë financat, do shkurtojë investimet publike, do godasë rëndë sektorin privat”, perfundoi Spaho.
