Tirana është finalistja e dytë e Superligës së volejbollit të meshkujve për sezonin 2022-2023.
Bardheblutë eliminuan Erzenin në gjysmëfinale duke e fituar serinë e takimeve me rezultatin 2-1, ndërsa tashmë do të kenë mundësinë që të luftojnë në aktin e fundit për të mbrojtur titullin kampion, teksa në finale do të gjejnë rivalët e qytetit, Partizanin.
Skuadra e Arben Sakos zhvilloi dje një ndeshje të shkëlqyer në pallatin e sportit “Dhimitraq Goga”, duke fituar me përmbysje në shifrat 3-1 ndaj shijakasve në një takim që zgjati rreth 1 orë e 50 minuta.
Për të përcaktuar kualifikimin ndërmjet kryeqytetasve dhe shijakasve u nevojit takimi i tretë, me Erzenin që kishte fituar 3-2 përballjen e parë, ndërsa Tirana 3-0 në të dytën. Kështu ekipet zbritën dje në parket për një ndeshje që vlente fatet e një sezoni të tërë.
Seti i parë dhuroi një luftë shumë të fortë, me skuadrat që i kundërpërgjigjeshin njëra-tjetrës thuajse në çdo pikë, ndërsa për të përcaktuar fituesin u deshën pikët shtesë. Pas dy gabimeve radhazi të argjentinasit Lapera, seti i parë shkoi në favor të shijakasve në shifrat 30-28.
Por në setin e dytë Tirana ndryshon “marsh”. Bardheblutë duken më të vendosur, gabojnë më pak dhe janë tepër efikasë në sulm. Kryeqytetaset dominojnë dhe e fitojnë setin bindshëm 16-25 me pikën e fundit që vjen nga blloku fitues i Ledion Martiros për vendosur baraspeshën 1-1.
Shijakasit e Parit Uruçit provojnë ta nisin me entuziazëm setin e tretë, por gradualisht kryeqytetasit e marrin përsëri kontrollin e lojës, për të fituar 18-25, duke kaluar në epërsi 1- 2 me sete.
Një rezultat që e rrit edhe më tepër moralin në kampin mik, ndërsa Erzeni duket i trullosur. Kështu Tirana u jep shijakasve goditjen e nokautit në setin e katërt në shifrat 15- 25, duke prerë biletën e finales për ta mbyllur me festën e merituar në parket.
Edhe një herë tjetër diferencën për Tiranën e bëri dyshja Ledion Martiro – Nahuel Lapera, me të parë që stampoi 26 pikë, ndërsa argjentinasi 25.
Në kampion shijakas pikëshënuesit më të mirë ishin Asmend Kula dhe braziliani Soares me nga 13 secili.
