Ambasada amerikane në Tiranë ka reaguar lidhur me takimet që po zhvillon në Tiranë Zëvendës Ndihmës Sekretari i SHBA për Çështjet Europiane, Gabriel Escobar.
Sipas ambasadës, theksi i mesazhit të zyrtarit amerikan lidhet me rekomandimet e ODIHR për zgjedhjet dhe figurën e kandidatëve për kryebashkiakë për lokalet e 14 Majit.
“Gabriel Escobar, Zëvendës Ndihmës Sekretari i SHBA për Çështjet Europiane dhe i Dërguari i Posaçëm për Ballkanin Perëndimor, mbërriti sot në Tiranë për takime me Presidentin Begaj, Kryeministrin Rama, Ministren e Jashtme Xhaçka dhe udhëheqës të tjerë.
Zëvendës Ndihmës Sekretari Escobar do të nënvizojë rëndësinë e zgjedhjeve të ardhshme vendore në Shqipëri, nevojën për të zbatuar rekomandimet e ODIHR-it dhe nevojën që partitë politike dhe liderët të sigurojnë që kandidatët të përmbushin kërkesat e ligjit si dhe pritshmëritë e qytetarëve shqiptarë për integritet të lartë”, thuhet në reagimin e ambasadës amerikane.
“Ai do të diskutojë gjithashtu bashkëpunimin SHBA-Shqipëri për përparësitë rajonale dhe globale, përfshirë refuzimin e pushtimit rus të Ukrainës”, thuhet më te në reagim.
