Kërcënimet e kryeministrit Edi Rama ndaj studentëve të Universitetit të Mjekësisë se do t’i frenojë të braktisin sistemin duke emigruar në Gjermani pas përfundimit të studimeve, duke u mbajtur “peng” diplomën duket se po shndërrohen në një plan të mirëfilltë.
“Paguajmë ne, ua bëjmë gati, vjen gjermani kur thonin filmat, edhe na i merr. Kjo nuk mund të vazhdojë kështu. Kështu që e para, diplomën e mjekët nuk do ta japim sapo të mbarosh shkollën. Do shkosh një herë t’ia kthesh popullit tënd atë që ka bërë për ty, pastaj do marrësh dhe diplomën e pastaj shko ku të duash, sipas afateve të caktuara. Për më tepër, e dimë shumë mirë se si në shumë vende, mjekët që janë standardi më i lartë i shërbimit human, nuk i marrin diplomat menjëherë por duhet të tregojnë dhe që janë të zotë tu shërbejnë njerëzve përveç se të japin provime, se nuk mund të vazhdojë kjo histori kështu”, u shpreh Rama në tetorin e vitit të shkuar.
Ashtu siç ka paralajmëruar prej më shumë se 6 muajsh, kryeministri duket se ka nisur hartimin e një strategjie së bashku me “Mjekësinë” për të ndalur “hemorragjinë” në sistemin shëndetësor vendas, duke formësuar idenë e një bllokade ndaj profesionistëve të rinj të fushës.
Sipas A2CNN, rritja e pagave në këtë sektor që kryeministri ka njoftuar në prag të fushatës zgjedhore, nuk është vetëm hapi i parë për të frenuar eksodin e mjekëve drejt Gjermanisë.
Kjo pasi, Universiteti i Mjekësisë ka hartuar një paketë propozimesh për t’i mbajtur në vend ata dhe politikat frenuese priten të nisin së shpejti me studentët e Mjekësisë.
Plani “Rama”, për të detyruar studentët që t’i kthejnë “borxhin” Shqipërisë duke punuar për disa vite në sistemin shëndetësor vendas do të nisë që para se ata të hyjnë në auditorët e fakulteteve.
Studentëve do t’u duhet kështu të firmosin një kontratë, ku ata do të pranojnë për të punuar së paku tre vjet në Shqipëri dhe diplomën e Mjekësisë do ta marrin vetëm pasi të kenë përmbyllur këtë detyrim.
Studentët që nuk pranojnë kushtet e parashtruara në këtë kontratë, ashtu siç Rama kishte kërcënuar do t’u duhet të paguajnë tarifën e shkollimit njësoj si në vendet e tjera, afro 18 mijë dollarë për të fituar të drejtën që të studiojnë në UM.
Ndërsa për mjekët në sistem, rritja e pagave do të shoqërohet më lehtësi të tjera, pasi punonjësit e sistemit shëndetësor publik do të mbështeten më kredi të buta.
Masat e Ramës dhe Universitetit të Mjekësisë, të cilëve u kërkoi adresimin e problemit janë të vonuara dhe vijnë pas më shumë se 10 vitesh “hemorragjie” që e kanë zhytur sistemin mjekësor në krizë profesionistësh.
Teksa spitalet mbeteshin bosh dhe mjekët fluturonin drejt Gjermanisë, qeveria e Edi Ramës nuk ndërmori asnjë politikë sociale për të ndaluar këtë fenomen shqetësues.
Këtë e tregojnë edhe shifrat që Universiteti i Mjekësisë raporton, pasi që nga 2016 mbi 1 mijë mjekë kanë braktisur punën në Shqipëri. Barrën e emigrimit në sistem e rëndon edhe më shumë fakti se 20% e të larguarve ishin më përvojë dhe në specialitete të ndryshme.
