Pak orë pasi makina iu hodh në erë me tritol në oborrin e banesës së tij në fshatin Paçram, kreu i degës së PD-së në Vaun e Dejës, Benard Ndreca ka folur për herë të parë për mediat.
Në krah të kandidatit opozitar të koalicionit “Bashkë Fitojmë” për zgjedhjet lokale të 14 Majit, Zef Hila, ai e konsideroi shpërthimin me tritol një sulm të motivuar politikisht.
Ndreca hodhi akuza për implikimin e policisë me përfaqësues politik në këtë ngjarje dhe pati një mesazh për rivalët e Zef Hilës në garën e 14 Majit.
“Në momentin që ka lëvizur makina nga vendi aty ka qenë shpërthimi. Nuk kam konflikte me asnjë, kjo është e përdorur politikisht. Nuk më është vendosur mua, por kreut të PD së Vaut të Dejës sepse këtu janë të organizuar mirë. Në Zonën e Vaut të Dejës dihet që përzihet politika me policinë. Nuk kam përplasje, as kërcënime. Thirrja ime është, duke filluar që nga kryeministri: ‘Të distancojnë policinë nga politika’. Lërini njerëzit të votojnë të lirë. I bëj thirrje çdo lloj krahu politik, se vullneti i njerëzve dihet se ku shkon, nuk i mbani dot bashkitë e vendeve me presion”, tha ai.
Ai zbuloi edhe detaje nga ajo çka kanë filmuar kamerat e sigurisë së shtëpisë së tij, duke thënë se dy autorëve të dyshuar u janë dashur vetëm 7 minuta për të montuar lëndën plasëse në mjetin tip “Audi”.
“Janë parë pamjet, vijnë dy persona, në orën 1:15 të natës, rreth 7 minuta aty, vendosin eksplozivin dhe largohen. Janë të maskuar”, shtoi Ndreca.
