Në komunikimin që pati sot me qytetarët në rrjetet sociale, kryedemokrati Sali Berisha u ndal gjatë tek tenderat abuziv që po përfitojnë familjarë të kryeministrit Edi Rama, duke nisur nga i vëllai Olsi e deri te baxhanaku Armand Frangu.
Sipas Berishës, familja e Ramës po vrapon pas tenderave në mënyrë të paligjshme, duke përfituar miliona euro të taksapaguesve shqiptarë.
“Vetëm tenderat e baxhanakut të Edi Ramës, një Fangu, Fangu, janë me dhjetëra, në mos qindra deri më tani. Pas Frangut, Olsi Rama, i vëllai i kryeministrit, ortaku i Amant Josifit, qëndron mburoja e vjedhjes 2.2 miliard eurove të qytetarëve europianë. Për dijeni, Amanti e ka mamanë drejtoreshë të Shërbimit Civil dhe nuk guxon ta prekë kush se ka mbështetjen e ortak-Olsit. Olsi është njeriu që mori përsipër të zhvillojë Spitallën me një kompani kineze, që doli të ishte kompani që merrej me menaxhimin e azileve”, tha Berisha.
Por, lideri i opozitës nuk u ndal këtu pasi akuzoi edhe të bijën e bashkëshortes së Ramës, Rea Xhillarin, si përfituese të tenderave abuzivë, ndërsa për nënën e saj Linda Rama tha se u kërkon prokurorëve njëjtë si Yuri Kim që të “arrestojnë Sali Berishën”.
“Nuk mbetet mbrapa thjeshtra. Unë e di se zonja Rama tërbohet dhe humbet kontrollin dhe kap prokurorët si guvernatorja se pse nuk arrestojnë Sali Berishën. Problemi i thjeshtrës është se vrapon pas tenderave në mënyrë të paligjshme. Nuk ka pse shtrin duart familja Rama. Asnjë pjesëtar i familjes nuk mund të marrë pjesë në prokurime, direkt apo indirekt. Asnjë prej tyre nuk mund të përfitojë nga koncesionet. Megjithatë, këta do përgjigjen para ligjit një ditë”, nënvizoi ai.
Më tej, kreu demokrat hodhi akuza të rënda edhe ndaj ministrit të Brendshëm, Blendi Çuçi, duke e akuzuar se është personi që fshihet pas serave të kanabisit, të zbuluara në zonën bujqësore të Beratit pak kohë më parë.
“Kriminaliteti nuk është në situatë kritike, por krimi sot e kontrollon plotësisht rendin. Rendi dhe siguria janë në duart e krimit të lidhur me qeverinë. Në një seri procesesh gjyqësore false, qeveria ka bërë të gjithë favoret ndaj bandave të saj. Ka shpërndarë para, ka dërguar çanta dhe valixhe me para për bandat. Ka lejuar të vrasin dhe ekzekutojnë pa u hyrë ferra në këmbë.
Çuçi është ministri i familjes. Ai ka një qëllim, të garantojë flukset e drogës në Shqipëri. Nëse ju, e mbani mend një serë në Berat, në të cilën punonin 100 gra mëditëse. E kujt ishte sera, thoni ju? Lidhjet e serës të çonin te vetë ministri. Pasi Aranit Arapi, një bajloz droge i përjashtuar nga policia për këto qëllime, dhe i marrë këshilltar nga ministri i familjes, qëndronte pas serës”, theksoi Berisha.
