Pas përfundimit të fjalëve hyrëse të dy avokatëve të tij, Gregory Kehoe dhe Luka Misetiq, edhe ish-presidenti i Kosovës Hashim Thaçi ka marrë fjalën në seancën gjyqësore që po zhvillohet në Hagë.
Thaçi në vetëm 5 minuta do të shpjegojë qëndrimin e tij lidhur me akuzat e Prokurorisë në nisje të procesit gjyqësor ndaj tij, Kadri Veselit, Rexhep Selimit dhe Jakup Krasniqit.
Në deklaratën e dhënë pa betim, Thaçi mohoi edhe njëherë të gjithë akuzat me të cilat e ngarkon Zyra e Prokurorit të Specializuar për krime lufte dhe akte kundër njerëzimit.
Thaçi deklaroi se i vjen keq për çdo viktimë që ka humbur jetën gjatë luftës, pa dallim etnie, përkatësie fetare apo politike.
“Viktimat nuk arrijnë të marrin drejtësi kur ndiqen të pafajshmit. Një padrejtësi nuk mund të zgjidhet me një padrejtësi tjetër”, u shpreh ish-Presidenti.
Ish-kreu politik i UÇK-së tregoi edhe motivin që e shtyu të kthehet nga Zvicra për t’iu bashkuar luftës në Kosovë kundër regjimit të ushtrisë, policisë dhe paramilitarëve serb në vitin 1998, e që sipas tij ishte masakra ndaj familjes Jashari në Prekaz.
“Sot po e nisim një rrugëtim së bashku drejt së vërtetës dhe drejtësisë. Ndjej keqardhje dhe dhimbje për të gjitha viktimat. Unë jam i pafajshëm, por i gatshëm të kem sukses në këtë rrugëtim. Isha student në Zvicër kur ndodhi masakra ndaj familjes Jashari. Unë, sikurse edhe shumë të tjerë, u kthyem nga atje në Kosovë”, është shprehur ish-kreu i PDK.
Gjithë konflikti, deri te çlirimi i Kosovës nuk do të ngjante pa ndihmën e aleatëve ndërkombëtar, për çka është shprehur se i vjen keq që në procesin gjyqësor ndaj tij nuk do të mund të dëshmojnë ish-sekretarja e shtetit Madeleine Albright, ish-ambasadori Richard Holbrooke e po ashtu edhe figurat vendore, përfshirë ish-presidentin Ibrahim Rugova, Fehmi Agani dhe Adem Demaçi.
“Lufta na u imponua dhe ne e bëmë atë që do ta bënte çdo popull liridashës. Më vjen keq që këtu në këtë proces nuk mund të dëshmojnë Albright, Holdbrooke, Demelio, Ibrahim Rugova, Fehmi Agani, Adem Demaçi. Ata do të dëshmonin në emrin tim”, ka thënë Thaçi.
Hashim Thaçi dhe shteti i Kosovës është shfajësuar njëherë tashmë, sipas ish-Presidentit, për vetë arsyen që e krijoi këtë gjykatë, raporti i senatorit Dick Marty, nga i cili “nuk ka dalë asnjë fakt dhe asnjë e vërtetë”.
“Jam i kënaqur që procesi e ka dëshmuar edhe njëherë se nuk ka pasur trafikim organesh e shtëpi të verdhë. Kosovës i është hequr reja e zezë të cilën ia kishte vënë Raporti i Martyt”, tha Thaçi.
Thaçi në përfundim të fjalës së tij theksoi se pret të shfajësohet edhe nga të gjitha akuzat tjera përballë ZPS-së.