Bonusi prej 5 mijë lekë që kryeministri Edi Rama ka vendosur t’u shpërndajë pensionistëve 40 ditë para zgjedhjeve lokale të 14 majit, për kreun e Partisë së Lirisë, Ilir Meta është lëmoshë dhe tentativë e hapur për të blerë votën e tyre.
Gjatë një bashkëbisedimi me gjimnazistë të shkollës ‘Gjergj Canco’, teksa fliste për situatën e Bashkisë Tiranë dhe të ardhmen me Belind Këlliçin në krye të saj, Meta hodhi akuza të rënda në drejtim të Ramës.
Ai u shpreh se qëllimi primar i vendimeve të qeverisë për rritje pagash dhe shpërndarje bonusesh është blerja e votës, në një kohë kur 400 mln euro që shkuan në buxhet nga rritja e çmimeve, Rama i ndau me klientët e tij.
“Tani u kujtua për pensionistët ai, para zgjedhjeve. Në dhjetor arkëtoi 400 mln euro si rezultat i rritjes së çmimeve. Në vend që t’ua kthente pensionistëve studentëve, këto para ua dha klientëve të vetë për qëllime korrupsioni dhe luksi. Besoj se me Belind Këlliçin si kryetar Bashkie do jetë tjetër transparencë. Një mbledhje këshilli nuk është zhvilluar në katër vjet. Investimet kanë qenë në rënie në Bashkinë e Tiranës”, tha Meta.
Kreu i PL u ndal edhe te emigrimi masiv i të rinjve në dekadën e fundit duke theksuar se Edi Rama nuk mund ta zëvendësojë rininë shqiptare me bangladeshas.
“Shqipëria iu përket të rinjve jo bangladeshasve. S’mund t’ju zëvendësojmë ju të rinjtë shqiptare më të rinj nga Bangladeshi. Ne jemi 100 vite shtet i konsoliduar. Duhet që të jemi me shembull për Kosovën. Sot ata kanë pagat më të larta, pse të mos i kemi ne kur kemi buxhetin dy herë më shumë?! Pse pedagogët të kërkojnë greva për pagat që ka Kosova sot? Pse mësuesit tanë t’i kenë pagat sa 60% e atyre në Kosovë?! Para për mësuesit, pedagogët dhe studentët nuk paska, por për inceneratorët që nuk ekzistojnë paskan. Është Monika që i ka filmuar me dronë. Kanë vënë ca kazanë, thonë jo po ngjyra e kuqe, jo po jeshile. Ato I merr kamioni dhe nuk bën as ndarje e asgjë, i bën bashkë. Ku shkojnë këto para?! Pagesat vazhdojnë, pasi shkojnë për korrupsionin e Edi Ramës. Është korrupsioni ai që po vret ëndrrat dhe mundësitë për të rinjtë. Shikoni emigrimin drejt Britanisë. Shqipëria është e para në botë për kërkesë për azil, pas saj janë vendet që janë në luftë. Gjen kurajo ai dhe bën cinikun dhe thotë; ‘Çunat e Kukësit s’kanë pse harxhojnë 10-15 mijë paund e t’i investojë këtu’. Po t’i kishin, nuk do iknin, ato para i marrin borxh”, nënvizoi Meta.