Tirana dhe Vllaznia janë kualifikuar për në gjysmëfinalet e Superligës së volejbollit të meshkujve, fazë ku do të sfidojnë respektivisht Erzenin dhe Partizanin.
Pasi kishin siguruar fitore në takimet e vajtjes në “para play off”, bardheblutë dhe shkodranët nuk kanë falur as në ndeshjet e kthimit që janë zhvilluar të shtunën. Tirana mposhti në derbi Studentin me rezultatin 1-3 në “Asllan Rusi”, në një takim interesant që zgjati 1 orë e 40 minuta.
Pas një loje të luftuar, skuadra e Arben Sakos fitoi setin e parë me rezultatin e ngushtë 23-25. Me të njëjtat shifra u kundërpërgjigj Studenti në fraksionin e dytë, duke vendosur baraspeshën 1-1 me sete.
Kampionët në fuqi reagojnë në setin e tretë, të cilin e fitojnë bindshëm 18-25, ndërsa i mbyllin llogaritë në setin e katërt në shifrat 21-25, duke hipotekuar triumfin dhe kualifikimin për në gjysmëfinale. Argjentinasi Lapera, me 22 pikë, ishte lojtari më i mirë për skuadrën e Arben Sakos.
Po kaq pikë edhe për brazilianin e Studentit, Rocha. Me rezultatin 3-1 fitoi edhe Vllaznia kundër Skënderbeut në Shkodër.
Miqtë nga Korça e filluan më mirë, teksa triumfuan 15-25 në setin e parë, por më tej kuqeblutë kthyen gjithçka në favor, duke fituar setet e radhës në shifrat 25-17, 25-21, dhe 25-11, për të vulosur kualifikimin.
