Orges Shehi paralajmëron Tiranën e tij që ka ikur koha e gabimeve.
Në një intervistë për “Panorama Sport”, numri një i bardhebluve pranon se Tirana duhet të luante në “Air Albania”, por detyrohet që të shkojë në Elbasan. Nga ana tjetër, trajneri thotë se problem tjetër është edhe pjesa e dëmtimeve që po e sakaton skuadrën bardheblu.
Do të luani një sfidë të rëndësishme me Erzenin. Si e shihni këtë ndeshje të fundit të fazës së tretë?
Është një ndeshje e vështirë. Kjo për vetë ecurinë që ka ekipi kundërshtar. Duhet të themi se e nisën si të ishin skuadra surprizë, por nga ana tjetër po tregon shumë qëndrueshmëri. Do të jetë një sfidë e vështirë për ne si Tirana. Kësaj vështirësie i shtohet edhe fakti që do të luajmë pa tifozë.
Në fund do të ndikojë që ndeshja luhet në Elbasan dhe pa tifozë në këtë sfidë?
Ne kishim shumë dëshirë që të luanim në “Air Albania”, por ngaqë nuk kishim mundësinë për të luajtur atje, po luajmë në Elbasan. Do të donim të luanim në shtëpinë tonë, por nuk kemi çfarë të bëjmë. Ky është vendimi që u mor.
Si ju duket shorti i Kupës së Shqipërisë. Do të luani me Teutën në një përballje delikate?
Në këtë fazë ku është kampionati, performanca e ekipeve është e njëjtë. Katër skuadra janë. Të gjitha kanë bërë mirë dhe kanë ardhur me meritë në atë pozicion. Deri në përballjen me Teutën në Kupë ka kohë. Fokusi duhet të jetë te kampionati. Personalisht nuk kisha ndonjë preferencë për shortin. Ne kërkojmë që të marrim më të mirën, ne jemi brenda objektivave. Ne do të tentojmë të bëjmë maksimumin. Kemi fituar Superkupën, edhe pse nuk është një trofe primar. Fokusi është te kampionati. Ne do të përqendrohemi. Fokusi është te ndeshja e radhës.
Ju shtohen dy ndeshje. Do të ndikojë në ndeshjet e kampionatit përballja me Teutën në Kupë?
Varet nga kontingjenti i lojtarëve që kemi. Patrikun e kemi humbur. Varet si do të jetë rikthimi i Abazajt. Shpresoj që të mos kemi dëmtime. Besoj se nuk ka shumë ngarkesë. Janë vetëm dy ndeshje më shumë dhe 13 gjithsej së bashku me finalen. Unë nuk mendoj se ka fat në këtë fazë. Në katër më të mirat shkojnë skuadrat që kanë bërë mirë. Kemi ecuri të mirë këtu dhe nuk ka favoritë. Pas ndeshjes së parë mund të shikosh se kush është i avantazhuar.
Duke e parë tani ftohtë, çfarë ka më shumë skuadra juaj për të fituar kampionatin?
Çdo njeri bën llogaritë e skuadrës së tij. Ne duhet të përmirësohemi edhe pas ndryshimeve të mëdha. Shpresoj që të na rikthehen lojtarët, Abazaj dhe Deliu që kanë një dëmtim. Duke qenë se duhet të fokusohemi te ndeshja jonë. Janë edhe 10 ndeshje kampionat dhe ne duhet të tregohemi shumë cinikë. Nuk ka më kohë për rikuperime. Këto dhjetë javë ne duhet të tregohemi cinikë dhe të gabojmë sa më pak. Ata që gabojnë më pak janë më afër titullit. Sigurisht që e dimë që çdo sfidë ka vështirësi dhe skuadrat janë me objektiva. Shto këtu edhe diferencat që nuk janë të mëdha. Titulli fitohet në fushë.
