Një person i paidentifikuar ka vendosur një send të dyshimtë poshtë një makine në qytetin e Pogradecit.
Ngjarja ka ndodhur në Lagjen 2, pranë prokurorisë së qytetit, ndërsa ka qenë roja i prokurorisë që ka vënë re lëvizjet dhe ka lajmëruar policinë.
Rreth orës 03:30 të mëngjesit ai ka parë një shtetas duke u shtrirë përtokë e duke vendosur dicka poshtë një makine të parkuar.
Fillimisht është dyshuar për eksploziv, dhe është sjellë nga Tirana grupi i shpërthimeve të kontrolluara. Por pas kontrollit të xhenierëve ka rezultuar se nuk ishte lëndë plasëse, por një aparat GPS për gjurmimin e vendndodhjes.
Mjeti është në pronësi të shtetasit Eris Çekani, i cili kohët e fundit ka patur disa konflikte me shtetas të tjerë në Pogradec, ku më i fundit është edhe përfshirja në një aksident “kokë më kokë” në Elbasan.
Nga ana e policisë, janë sekuestruar të gjitha kamerat në zonë, për të bërë të mundur identifikimin e personit që ka vendosur GPS.
Njoftimi i Policisë:
“Mëngjesin e sotëm, në lagjen nr. 3, Pogradec, nën dy automjetet në pronësi të shtetasit E. Ç., 39 vjeç, banues në Pogradec (të cilat i lëshon me qira) janë konstatuar dy sende të dyshimta. Në vendngjarje shkuan shërbimet e Policisë dhe nga verifikimet e kryera, rezultoi se nuk ishin lëndë plasëse, por ishin dy GPS.
Grupi hetimor vijon veprimet për sqarimin e rrethanave të rasit.”
